Ն.Ս.Օ․Տ.Տ. ԳԱՐԵԳԻՆ ԵՐԿՐՈՐԴ ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ ՇՆՈՐՀԱՎՈՐԱԿԱՆ ՈՒՂԵՐՁԸ ՀԱՂԹԱՆԱԿԻ ԵՎ ԽԱՂԱՂՈՒԹՅԱՆ, ՇՈՒՇԻԻ ԱԶԱՏԱԳՐՈՒԹՅԱՆ ԵՎ ՊԱՇՏՊԱՆՈՒԹՅԱՆ ԲԱՆԱԿԻ ՕՐՎԱ ԱՌԻԹՈՎ


Մայր Աթոռ Սուրբ Էջմիածնից հոգու բերկրությամբ Հայրապետական Մեր օրհնությունն ու շնորհավորանքներն ենք բերում սիրեցյալ համայն մեր ժողովրդին` Հաղթանակի և խաղաղության, Շուշիի ազատագրության և Պաշտպանության բանակի օրվա առիթով:

Ն.Ս.Օ․Տ.Տ. ԳԱՐԵԳԻՆ ԵՐԿՐՈՐԴ
ԱՄԵՆԱՅՆ ՀԱՅՈՑ ԿԱԹՈՂԻԿՈՍ ԵՎ ԾԱՅՐԱԳՈՒՅՆ ՊԱՏՐԻԱՐՔ

Այսօր, երբ նշում ենք պանծալի Հաղթանակի 75-ամյա հոբելյանը, առանձնակի ջերմությամբ շնորհավորում և Մեր բարեմաղթանքներն ենք բերում Երկրորդ աշխարհամարտի և Հայրենական մեծ պատերազմի վետերաններին: Ջերմորեն ողջունում և շնորհավորում ենք Արցախի ազատամարտին մասնակցած մեր ժողովրդի զավակներին և այսօր մեր հայրենիքի սահմանները անառիկ պահպանող մեր բանակի քաջարի սպաներին ու զինվորներին:

Հայրենիքի պաշտպանության, ազատության, խաղաղության նվիրական խորհուրդն ունի մեզ համար Մայիսի 9-ը: Երկրորդ աշխարհամարտում ձեռք բերված հաղթանակի կերտման և աշխարհում խաղաղության հաստատման գործում մեր փոքրաթիվ ժողովուրդը ունեցել է հերոսական մասնակցություն և արժանի ներդրում: Հայկական դիվիզիաների, ռազմական խմբավորումներ գլխավորող հայ զորահրամանատարների, հայ սպաների ու զինվորների սխրանքներն ու անցած փառապանծ ուղին մեր պատմության նշանակալի էջերից են, որոնց մեր ժողովուրդը միշտ հպարտությամբ է անդրադառնալու: Հայրենիքի ազատ, ապահով և խաղաղ կյանքի նույն ձգտումով ու նվիրումով մեր ժողովուրդը հաղթանակեց նաև արցախյան ազատամարտում: Հաղթանակեց հավատով, միահամուռ ջանքերով, բոլոր մարտահրավերներին դիմակայելու նախանձախնդրությամբ ու հանձնառությամբ և հայրենի Արցախում շեն ու բարօր նոր կյանք կառուցելու պայծառ տեսլականով:

Մայիսի 9-ի նվիրական հիշատակներն ու հաղթանակները միշտ պիտի զորացնեն մեզ, քաջալերեն դիմակայելու ծանր իրավիճակներին, հատկապես այսօր, երբ աշխարհը համակված է համընդհանուր նոր տագնապով, համավարակի բերած բազմաթիվ մտահոգություններով ու խնդիրներով, որոնք հուզում են նաև մեր կյանքը:

Աղոթում ենք, որ մեր ժողովուրդը առ Աստված ապավինությամբ, համախմբված ու միմյանց աջակից հաղթահարի մեր երկրի առջև ծառացած ներկա մարտահրավերները և միշտ ապրի հայրենիքին, ազգային կյանքին նվիրվածությամբ, նոր ձեռքբերումների հավատով ու վստահությամբ: Եվ թող հարուցյալ մեր Տիրոջ և Փրկչի` Հիսուս Քրիստոսի հույսի, սիրո ու հավատի շնորհներն առաջնորդեն մեզ հաջողելու ամեն բարի գործի մեջ:

Մայր Աթոռ Սուրբ Էջմիածինը և Վայոց ձորի թեմը կրկին իրենց աջակցությունն են ցուցաբերել Գլաձոր համայնքի անապահով ընտանիքներին


Համավարակը հաղթահարելու նպատակով՝ Մայր Աթոռի և Վայոց ձորի թեմի կողմից Գլաձոր համայնքի թվով քսան սոցիալապես անապահով ընտանիքների տրամադրվել են սննդի փաթեթներ:

Եվս մեկ անգամ շնորհակալություն ենք հայտնում Մայր Աթոռին և Վայոց ձորի թեմին համավարակի օրերին Գլաձոր համայնքին աջակցելու համար։

Աղբյուր՝ Գլաձորի համայնքապետարան

Աջակցություն Ջերմուկ համայնքի սոցիալապես անապահով (45) ընտանիքներին


Կորոնավիրուսի հետևանքով ստեղծված իրավիճակը հաղթահարելու նպատակով՝ Մայր Աթոռի և Վայոց ձորի թեմի կողմից, Ջերմուկ համայնքի սոցիալապես անապահով (45) ընտանիքներին, արդեն 2-րդ փուլով, (նախորդ փուլում ծրագրից դուրս մնացած ընտանիքներին) տրամադրվել են 30 կգ-ոց սննդի փաթեթներ:


Շնորհակալություն ենք հայտնում Մայր Աթոռին և Վայոց ձորի թեմին` բարի կամքի դրսևորման համար:

Աղբյուր՝ https://www.facebook.com/jermukcity/posts/3183182511712458

Աջակցություն Եղեգնաձորի ցերեկային խնամքի կենտրոնի սաների ընտանիքներին


Մայր Աթոռ Սուրբ Էջմիածնի և Վայոց ձորի թեմի կողմից մայիսի 8-ին սննդային օգնության /29 կգ-ոց/ փաթեթներ բաժանվեցին Վայոց ձորի թեմի առաջնորդարանում գործող Եղեգնաձորի ցերեկային խնամքի կենտրոնի երեխաների  ընտանիքներին, որոնք կորոնավիրուսի հետ կապված՝ արտակարգ դրության հետևանքով հայտնվել են ծանր վիճակում։ 

Երեխաների ծնողները խորին շնորհակալություն են հայտնում կազմակերպիչներին։

Հաղթանակի ու խաղաղության եռատոն


Մայիսի 9-ին տոնում ենք Հայրենական մեծ պատերազմում հաղթանակի 75-ամյակը, Շուշիի ազատագրման և Արցախի պաշտպանության բանակի ստեղծման 28-րդ տարեդարձը։

Սրտանց շնորհավորում ենք
մեր ժողովրդին՝ Մայիսի 9-ի
հաղթանակների առիթով:

«Նախրիխտենդինստ Օստլիխե Կիրխեն» շվեյցարական առցանց ամսագրի ծավալուն անդրադարձը Հայաստանում հայտարարված արտակարգ իրավիճակի և կորոնավիրուսի դեմ իրականացվող համաժողովրդական պայքարին


Օրերս «Նախրիխտենդինստ Օստլիխե Կիրխեն» շվեյցարական առցանց ամսագիրը ծավալուն անդրադարձ է կատարել Հայաստանում հայտարարված արտակարգ իրավիճակի և կորոնավիրուսի դեմ իրականացվող համաժողովրդական պայքարին:

Հոդվածի նկարում Հայ առաքելական եկեղեցու Վայոց ձորի թեմի առաջնորդ Աբրահամ Արքեպիսկոպոս Սրբազանն ու Վայոց ձորի մարզպետի խորհրդական Արմեն Դավթյանն են՝ կարտոֆիլի սերմացու բաշխելիս

Ամսագրի գլխավոր խմբագիրը Շտեֆան Կուբեյնն է։ Նա մասնագիտությամբ աստվածաբան է։ 5 տարի առաջ այցելել է Հայաստան։ Միջազգային լրագրողների կազմում Սբ. Էջմիածնում մասնակցել է Ցեղասպանության նահատակների սրբադասման արարողությանը, այցելել է աղետի գոտի։

Պրն. Կուբեյնը  չափազանց հետաքրքրված  էր Հայաստանի ներկա վիճակով ու մասնավորապես, համաճարակի կասեցման գործընթացում նոր իշխանությունների և Հայ Առաքելական Եկեցու դերակատարությամբ։

Բացի այդ ամսագիրը, նպատակ ուներ Եվրոպայի գերմանախոս ընթերցողի համար անդրադարձ կատարելու այս տարվա ապրիլին «արտակարգ» պայմաններում կատարվող Մեծ եղեռնի հիշատակության միջոցառումների նոր ձևաչափին։

Հրապարակման նախապատրաստումը խմբագրության կողմից առաջարկվեց մեր հայրենակից, Աստվածաբանության դոկտոր Հարություն Հարությունյանին։

Դոկտոր Հարությունը ամիսներ առաջ է արևմտյան Եվրոպայից տեղափոխվել Հայաստան և այժմ անկախ փորձագիտական խորհրդատվություններ է իրականացնում Հայ առաքելական եկեղեցու Վայոց ձորի թեմում և «Սյունիք-Զարգացում» ՀԿ-ում՝ օժանդակելով մարզում նոր միջազգային զարգացման ծրագրերի մշակմանն ու իրականացմանը։

Դոկտ. Հ. Հարությունյանի՝ ապրիլի 30-ին լույս տեսած հոդվածի առաջին բաժինը նկարագրում է Հայաստանի ընդհանուր իրավիճակը՝ անկախացումից հետո առաջացած տնտեսական դժվարություններ, Արցախյան գոյամարտից հետո Ադրբեջանի կողմից շարունակվող ոտնձգության մարտահրավերներ, թուրքական հակապատմական ու մերժողական կեցվացք, սահմանների շրջափակում, ռեսուրսների սակավություն, ռուսական էներգետիկ աղբյուրներից կախվածություն, պարսկական ներմուծման  և վրացական միջանցիկ ուղու կենսական նշանակություն, ընդհանուր սոցիալական խնդիրներ։

«Դժվար է պատկերացնել, որ որևէ երկիր նման դրության մեջ կարող էր դեռևս ուժ գտնել իր մեջ՝ դիմակայելու կորոնավիրուսի ճգնաժամին։ Չնայած այս ամենին՝ Հայաստանի երիտասարդ կառավարությունն իր ծանրաբեռնված պետական մարմինների և սակավաթիվ  բուժանձնակազմի հետ միասին ձեռնարկեցին բոլոր անհրաժեշտ քայլերը երկրում կայուն վիճակի պահպանման ու ժողովրդի հետ մեկտեղ այս իրավիճակից հնարավորինս անվտանգ խուսանավելու համար»,- նշում է հոդվածի հեղինակը։

Կարդալ ավելին

Տ. Զարեհ վրդ. Կաբաղյանի քարոզը՝ նվիրված Աշխարհամատրան Կանաչ կիրակիի և Նորավանքի ուխտի օրվան


«Ուրեմն դեն գցելով ամեն չարություն, մոտեցեք Նրան՝ Կենդանի Վեմին,
որը Աստուծո առաջ ընտրյալ և թանկագին է»:

Պետրոս առաքյալի սրտառուչ այս խոսքերը բնորոշում են այսօրվա՝ Աշխարհամատրան Կանաչ Կիրակիի խորհուրդը: Տակավին Տիրոջ Հարության այս հոգենորոգ օրերին Հայ Առաքելական Սուրբ Եկեղեցին ոգեկոչում է աշխարհի առաջին եկեղեցու հիմնադրումը, որի Կենդանի Վեմը Հիսուս Քրիստոսն է: Նրա վրա հիմնվեց Աստուծո տունը՝ Սբ. Եկեղեցին՝ իբրև մարդկության փրկության ճշմարիտ գրավական, ինչպես ասում է Եսայի մարգարեն. «Ահավասիկ ընտիր վեմ եմ դնում Սիոնի մեջ, թանկագին անկյունաքար, և ով նրան հավատա, ամոթով չպիտի մնա»:

Վայոց Ձորի թեմի փոխառաջնորդ, Նորավանքի վանահայր


Սիրելինե՛ր, Ընդհանրական Ս. Եկեղեցին Աշխարհամատուռ է կոչվում, քանի որ այն առաջին աղոթավայրն է առաքյալների և առաջին քրիստոնյաների: Այն Վերնատունն է, ուր Վերջին ընթրիքին Հիսուս Քրիստոս հաստատեց Սբ. Պատարագի խորհուրդը, որով միայն կարող ենք հաղորդվել Իր հետ, ընդունել Իր Անապական Մարմինը՝ իբրև մեղաց թողության, իբրև փրկություն:

Աշխարհամատրան Կիրակին կանաչ է կոչվում՝ խորհրդանշելով բնության վերազարթոնքը, դրա նմանությամբ Քրիստոսի ճշմարիտ եկեղեցու ծաղկումն ու զարթոնքը: Այսօր Քրիստոսի Սբ. Եկեղեցու հիմնադրության փառապանծ տոնն է:
Ի՞նչ նշանակություն և խորհուրդ ունի այն մեզ համար:
Մարդկության փրկության և հավիտենական արքայության համար մեզ սրբելու, այս աշխարհի փորձությունները հաղթելու, Քրիստոսի Կենարար լույսով մեզ լուսավորելու առաքելությամբ է գործում եկեղեցին աշխարհի վրա:


Եկեղեցին Աստվածային տեսիլքի իրագործումն է աշխարհում, սակայն հավատ, իմաստություն և զոհողություն է պետք Աստվածային տեսիլքով հաստատվածը արժևորելու և ապրեցնելու համար, որովհետև եկեղեցիով է շարունակվում Աստվածային փրկագործությունը:

Կարդալ ավելին

Աշխարհամատրան Կանաչ կիրակին՝ Նորավանքի ուխտի օր


1999թվականի ապրիլի 19-ին՝ Կանաչ կիրակիի օրը, Ն.Ս.Օ.Տ.Տ. Գարեգին Ա Ամենայն Հայոց Կաթողիկոս և Ծայրագույն Պատրիարքի ձեռամբ օծվեց և վերաբացվեց Նորավանքի համալիրը և այդ հիշարժան օրվանից սկսած՝ Կանաչ կիրակին դարձավ Նորավանքի ուխտի օր:

Նորավանքի վանական համալիրի և շրջակայքի վերակառուցման աշխատանքներն իրագործվեց այն ժամանակ Սյունյաց թեմի առաջնորդ, այժմ՝ Վայոց ձորի թեմի առաջնորդ Տ.  Աբրահամ արքեպիսկոպոս Մկրտչյանի ամենօրյա աշխատանքի ու համառ ջանքերի շնորհիվ:

Հայկական ճարտարապետության այս գոհարի վերականգնմանը, շրջակայքի կառույցների 1999թ.-ի վերանորոգման և համալիրի կառուցման բարերարներն են Կանադայի Մոնթրեալ քաղաքի բնակիչներ տիար Տիգրան և տիկին Դիանա Հաճեթյանները, իսկ վերանորոգման նախագծի հեղինակն էր ճարտարապետ պրն. Հրաչյա Գասպարյանը:

Ապրիլի 26-ին Նորավանքում Սուրբ և Անմահ Պատարագ մատուցեց թեմի փոխառաջնորդ և Նորավանքի վանահայր Տեր Զարեհ վրդ. Կաբաղյանը, ով հավուր պատշաճի քարոզ խոսեց, որը կարող եք կարդալ այստեղ:

Հավարտ Սուրբ Պատարագի կատարվեց Անդաստանի կարգ:

Այնուհետև հոգեհանգստյան կարգ կատարվեց բարերար տիար Տիգրան Հաճեթյանի շիրմին:

Հիշեցնենք, որ ամեն տարի Նորավանքի ուխտի օրը, բարերար տիկին Դիանա Հաճեթյանի նախաձեռնությամբ էր համամարզային մեծահանդես տոնախմբություն և սիրո ճաշ կազմակերպվում:

Այս տարի համաճարակի պատճառով այդ միջոցառումները չեղարկվեցին, սակայն տոնի կապակցությամբ Առաջնորդ Սրբազան Հոր օրհնությամբ և բարերարուհու օժանդակությամբ, 50-ից ավելի կարիքավոր ընտանիքների բաժանվեցին սննդի ծանրոցներ:

Թող Ամենակալ Աստված օրհնի մեր ազգը, մեր հայրենիքն ու Սուրբ Եկեղեցին մեր, ժողովրդի բարի իղձերն իրականացնի, ուխտն ի կատար ածի, և Նորավանքն էլ իր աստվածաշնորհ զորությամբ օգնական ու պահապան թող լինի բոլորին. ամեն:

Ապրիլի 26-ին Աշխարհամատրան Կանաչ կիրակիի և Նորավանքի ուխտի օրն է


«Ուրեմն դեն գցելով ամեն  չարություն,
մոտեցեք  Նրան՝  Կենդանի Վեմին,
որը Աստուծո առաջ ընտրյալ և թանկագին է»:

Պետրոս առաքյալի սրտառուչ այս խոսքերը բնորոշում են Աշխարհամատրան Կանաչ կիրակիի խորհուրդը:

Հիսուս Քրիստոսի Հարության` Սբ. Զատկին հաջորդող երրորդ կիրակին կոչվում է Աշխարհամատրան կիրակի` ի հիշատակ Երուսաղեմի առաջին եկեղեցու հիմնադրման, որի Կենդանի Վեմը Հիսուս Քրիստոսն է:

Նրա վրա հիմնվեց Աստուծո տունը՝ Սբ. Եկեղեցին՝ իբրև մարդկության փրկության ճշմարիտ գրավական, ինչպես ասում է Եսայի մարգարեն. <<Ահավասիկ ընտիր վեմ եմ դնում Սիոնի մեջ՝ թանկագին անկյունաքար, և ով նրան հավատա, ամոթով չպիտի մնա>>:

Ընդհանրական Սբ. Եկեղեցին Աշխարհամատուռ է կոչվում, քանի որ այն առաջին աղոթավայրն է առաքյալների և առաջին քրիստոնյաների: Այն Վերնատունն է, ուր Վերջին ընթրիքին Հիսուս Քրիստոս հաստատեց Սբ. Պատարագի խորհուրդը, որով միայն կարող ենք հաղորդվել Իր հետ, ընդունել Իր Անապական Մարմինը՝ իբրև մեղաց թողության, իբրև փրկություն: Աշխարհամատրան  Կիրակին նաև կանաչ է կոչվում՝ խորհրդանշելով բնության վերազարթոնքը, դրա նմանությամբ Քրիստոսի ճշմարիտ եկեղեցու ծաղկումն ու զարթոնքը:

Կանաչ կիրակիի օրը հատկապես սիրելի է վայոցձորցիների համար, քանի որ 1999թ-ի հենց այդ օրը երջանկահիշատակ  Ն.Ս.Օ.Տ.Տ. Գարեգին Ա Ամենայն Հայոց Կաթողիկոս և Ծայրագույն Պատրիարքի ձեռամբ օծվեց և վերաբացվեց Նորավանքը, որ տարիներ շարունակ փակ էր: 

Այդ հիշարժան օրվանից սկսած՝ Կանաչ կիրակին դարձավ Նորավանքի ուխտի օր:

Տ. Զարեհ վրդ. Կաբաղյանի քարոզը՝ նվիրված Մեծ եղեռնի զոհերի հիշատակին


«Մի՛ վախեցեք նրանցից, որ մարմինն են

սպանում,բայց հոգին սպանելչեն կարող»:

(Մատթ. 10:28)

Ավետարանական այս պատգամը թող խորհուրդը լինի այսօրվա՝ Ապրիլի 24-ի, հայոց Մեծ եղեռնի զոհերի հիշատակի օրվա: Այսօր, նահատակաց հիշա­տակի ոգեկոչման այս սրբազան պահին, ազգովի խոնարհվենք նրանց անշիջելի հիշատակի առջեւ, տխրության ողբն ու աղաղակը վերափոխենք մխիթարու­թյան, որովհետեւ մեռան նրանց մարմինները, իսկ հոգիներն ապրում են հավեր­ժության մեջ: Այդ հոգիներն այսօր էլ մեզ հետ են, մեր մեջ, մեր կողքին: Եվ  չմոռանանք երբեք՝ «Արիւն մարտիրոսաց, սերմն քրիստոնեից»:

Ովքե՞ր էին նրանք, 1915-ի ցեղասպանության զոհերը: Նրանք մեր դրախ­տային պատմական հայրենիքում ապրող հայերն էին, որոնց երազները նման էին ապրիլյան ծաղկած այն ծառին, որն այդպես էլ, ծաղիկներով հանդերձված, այր­վեց: Նրանք հայրենիք ունեին, ուր ինչպես վաղամեռիկ բանաստեղծն էր երգում «Հոգիներուն կիջներ երազ մը բուրյան», ունեին օջախ, ունեին երգ՝ կոմիտասյան անլռելի երգ, որի ելեւէջներում իրենց շիտակ ու աստվածավախ կյանքի հմայքը կար: Նրանք՝ պարզ շինական, թե մտավորական, ապրում էին արարելով, վաս­տակելով հացն իրենց հանապազօր, մեկն իր ցորնաբույր ձեռքերի զորությամբ, մյուսն իր մտքի ուժով: Բայց այդ ժողովրդին վիճակված էր խաչի մի երկար ճա­նապարհ: Նրա կյանքի ուղին նման էր իր Տիրոջ կյանքին, եւ նա քայլեց այդ ուղիով դեպի Գողգոթա: Այն տեղահանությունների, սովի, ցավի, տառապանքի եւ վերջապես զոհաբերության ճանապարհն էր, զոհաբերության՝ «վասն հաւատոյ, վասն հայրենեաց»: Դա այն ճանապարհն էր, որով քայլեցին մեր աստվածասեր ու հայրենասեր նախնիները՝ ապավինելով հոգու անմահության ճշմարիտ գաղափարին: Վկայակոչենք Վարդանանց, որոնց նահատակությունը նրանց դեպի անմահության աոաջնորդեց: Հեշենք, թե ինչպես Վարդան՝ սրբացած զորավարն հայոց, Ավարայրի ճակատամարտից առաջ դիմեց հայ ժողովրդին, ասելով, որ մենք, թեեւ մարմնով երկրի վրա ենք, բայց երկնքում է մեր հոգին, ուր ոչ ոք չի կարող մերձենալ Քրիստոսի անձեռակերտ այդ շինվածքին: Նա պատգամեց հաստատուն լինել մեր ամենավստահելի Զորագլխի հավատքի մեջ, որ բնավ չպիտի մոռանա նահատակվողներին:

Կարդալ ավելին

Եղեռն և Վերածնունդ


Պատմությունը չեմ կարծեր, թե արձանագրած
ըլլա այդպիսի կոտորած մը…

Չեմ կարծեր, թե որևէ գրիչ կամ բերան կարենա
նկարագրել այն զարհուրելի  նախճիրները,
որոնք տեղի ունեցան 1915 թ.-ին:

(Արքեպիսկոպոս Զ. Եղիայան)

Պատմությունն ունի իր անսասան կամքը. եղերական 15-ին պիտի հաջորդեր հերոսական 18-ը: Ապա պիտի գային մեր վերածննդի և բուռն ծաղկումի տասնամյակները: Պիտի կառուցվեր այսօրվա Հայաստանը՝ հանուր հայության ոգեղեն և մարմնավոր հայրենիքը, մեր միակն ու անփոխարինելին: Մեր սրբության սրբոցը: Եվ եթե եղեռնից հետո մեր վշտակիր բարեկամները ցավով մտածում էին, թե հազիվ ոտքի կանգնի մի ժողովուրդ, որի գլխով եղեռն է անցել, ապա այսօր միայն կույրերը կարող են աշխարհին ի լուր չբարբառել, թե մահ չունի մի ազգ, որ եղեռն է տեսել, եղեռնից հետո հաղթել է Սարդարապատում և այսօր աշխարհի հետ խոսում է իր սեփական լեզվով և ինքնուրույն ու ինքնատիպ մշակույթի գանձերով:

Տասնամյակներ են անցել եղերական այն օրերից: Վերածննդի ու վերընձյուղման, ծաղկումի ու բարգավաճման տասնամյակներ: Եվ կոտորածից, մահերից ու ավերածություններից հրաշքով փրկված մի բուռ Հայաստանը դարձել է ոչ միայն տեղաբնիկների նորոգ երկիրը,  այլև անցած տասնամյակներում հայրենադարձված զանգվածների երջանիկ օթևանը, աշխարհի տարբեր երկրներում հանգրվանած ամբողջ հայության հոգու հայրենիքն ու ազգապահության կենսահյութերի հորդաբուխ աղբյուրը։

Սովորաբար որևէ երկրի զարգացման թափն ակնառու դարձնելու համար համեմատության մեջ են դնում նրա ներկայի և անցյալի որևէ շրջանի վիճակներն արտահայտող ցուցանիշները:

Հայաստանի պարագային այդօրինակ համեմատություններն անիմաստ են, որովհետև խորհրդային կարգերի նախօրեին կամ նրանից առաջ, ամենայն հայոց մեծ բանաստեղծի պատկերավոր վկայությամբ, այն դարձել էր «զարկվա′ծ հայրենիք, զրկվա′ծ հայրենիք»,«ողբի′ հայրենիք, որբի′ հայրենիք»։



Գյուղական տնտեսությունը քայքայված էր և չէր կերակրում հողի աշխատավորին։ Չկար արդյունաբերություն այս բառի իսկական առումով: Եվ հեռու միջնադարում համալսարաններ ունեցած Հայաստանի լուսատենչ զավակները խարխափում էին խավարի մեջ կամ գիտության իրենց անհագ ծարավը հագեցնում էին Ռուսաստանի ու Եվրոպական մյուս երկրների համալսարաններում։

1910–ական թվականներին մեծն Թումանյանը տենչում էր այն օրը, երբ հայ ժողովուրդն իր գլխի վերև կունենա խաղաղ երկինք, և հայոց մտավոր ցրված ուժերը կմեկտեղվեն ու կստեղծեն գիտական մի հաստատություն՝ Հայկական ակադեմիա։ Այսօր Հայաստանի աշխարհահռչակ ակադեմիայի համակարգում գործում են մի քանի տասնյակ ինստիտուտներ, որոնց գիտական վաստակը դուրս է եկել ազգային սահմաններից, գրավել համամիութենական ու համաշխարհային գիտական հասարակայնության համակիր ուշադրությունը։

Հայաստանը մեծ գիտության, առաջադիմական լուսավորության ջահակիրն է։ Նրա բարձրագույն ուսումնական հաստատություններում՝ համբավավոր համալսարանում ու կոնսերվատորիայում, մանկավարժական, պոլիտեխնիկական, բժշկական և այլ ինստիտուտներում ուսում են առնում հայ ժողովրդի երջանիկ երիտասարդները՝ սփյուռքահայ հայրենակիցների և արտասահմանյան հարյուրավոր այլազգիների հետ միասին։

Կարդալ ավելին

Հայոց ցեղասպանության ճանաչման գործընթացը


Հայոց ցեղասպանության ամենասև էջը թուրքական պետության կողմից իրականացված հայակական ցեղասպանությունն է, որը հայ ժողովրդին հասցրել է մարդկային, տարածքային, մշակութային և նյութական անդառնալի կորուստներ:

1948թ. դեկտեմբերի 9-ին ՄԱԿ-ն ընդունեց «Ցեղասպանություն հանցագործությունը կանխելու և դրա համար պատժի մասին կոնվենցիա»: 

Այն միջազգային իրավունքի տեսանկյունից ցեղասպանությունը բնորոշող և դրա համար պատիժ սահմանող փաստաթուղթ է: Ցեղասպանություն են համարվում այն գործողությունները, որոնք կատարվում են որևէ ազգի, ցեղային կամ կրոնական խմբի լիակատար կամ մասնակի ոչնչացման մտադրությամբ:

Հինգ կետերով թվարկվում են այն գործողությունները, որոնցից յուրաքանչյուրը համարվում է ցեղասպանության ակտ. 1. Խմբի անդամների սպանությունը, 2. Նրանց մարմնական լուրջ վնասվածք կամ մտավոր խանգարում պատճառելը, 3. Խմբի համար այնպիսի կենսապայմանների ստեղծումը, որոնց նպատակն է այդ խմբի լիակատար կամ մասնակի ֆիզիկական ոչնչացումը, 4. Խմբի ներսում ծննդաբերության կանխմանն ուղղված միջոցառումները, 5. Երեխաների հանձնումը մարդկային մի խմբից մյուսին:

Օսմանյան կայսրությունում 1878-1922թթ. տեղի են ունեցել բոլոր 5 կետերում նշված գործողությունները հայ ժողովրդի նկատմամբ: Հայոց ցեղասպանությունն իրականացվել է ավելի քան 4 տասնամյակների ընթացքում և եղել է թուրքական իշխանությունների պետական քաղաքականությունը: Այն իր գործադրման բնույթով ու եղանակներով կարելի է բաժանել 3 փուլերի:

Առաջին շրջանը ընդգրկում է 1878-1914թթ. միջև ընկած ժամանակաշրջանը: Այն համընկնում է Աբդուլ Համիդ սուլթանի իշխանության տարիներին և երիտթուրքերի կառավարման սկզբնական շրջանին: Այս փուլում խոշոր զանգվածային ջարդեր տեղի ունեցան 1894-1896թթ. և 1909թ.: Հայերի կոտորածներն իրականացվեցին առանց բռնագաղթի, տեղերում: Դա հնարավորություն էր տալիս որոշ չափով դիմադրել ջարդարարներին և այն չվերածվեց համընդհանուր բնաջնջման: Միաժամանակ, այնպիսի պայմաններ ստեղծվեցին, որոնք հայերին ստիպում էին արտագաղթել հայրենիքից:

Կարդալ ավելին

Նորավանքի ուխտին ընդառաջ


Ապրիլի 26-ին Կանաչ կիրակիի օրն է, ինչպես նաև  Նորավանքի ուխտի օրը: Ամեն տարի, Նորավանքի բարերար տիկին Դիանա Հաճեթյանի ազնիվ բարերարությամբ, այդ օրն մեծ տոնախմբություն և ընդունելություն է կազմակերպվում:

Նորավանքի բարերարներ՝ Տիար Տիգրան և Տիկին Դիանա Հաճեթյաններ

Այս տարի, հայտարարված արտակարգ դրության պատճառով, բնականաբար, դրանք չեղյալ հայտարարվեցին, կմատուցվի միայն Սուրբ և Անմահ Պատարագ:

Վայոց ձորի թեմի առաջնորդ Տ. Աբրահամ արքեպիսկոպոս Մկրտչյանի նախաձեռնությամբ և օրհնությամբ ու տիկին Դիանա Հաճեթյանի նյութական օժանդակությամբ, Նորավանքի ուխտի օրվան ընդառաջ, Եղեգնաձորի բժշկական կենտրոնի 23 աշխատակիցների և մարզի անապահով 27 ընտանիքների տրվեցին սննդի ծանրոցներ:

Առաջնորդ Սրբազան Հոր կողմից Եղեգնաձորի բժշկական կենտրոնի բոլոր հիվանդասենյակների համար տրվել են սրբապատկերներ, իսկ այդ պահին բուժվող հիվանդներին՝ Աստվածաշունչ:

Թեմի կողմից տրվող մարդասիրական հերթական օգնությունը բաժանեցին Եղեգնաձորի տարածաշրջանի հոգևոր հովիվ Տեր Վազգեն քահանա Հովհաննիսյանը և թեմի Երիտասարդաց միության ատենապետ Գագիկ սարկավագ Հակոբյանը:

կարդալ ավելին

Վայոց ձորի թեմը սահմանապահ Խաչիկ բնակավայրին տրամադրեց 3 տ գարու սերմացու


Վայոց ձորի մարզի Արենի համայնքի Խաչիկ բնակավայրին Հայ Առաքելական Սուրբ Եկեղեցու Վայոց ձորի թեմը տրամադրեց 3 տ գարու սերմացու: Խաչիկցիներին գարու սերմացուի տրամադրումը Վայոց ձորի մարզում կորոնավիրուսի հետևանքները մեղմելուն ուղղված հերթական թիրախային օժանդակությունն է, որն իրականացվում է թեմի Առաջնորդ, Գերաշնորհ Տ. Աբրահամ արքեպիսկոպոս Մկրտչյանի նախաձեռնությամբ:
Գերաշնորհ Տ. Աբրահամ արքեպիսկոպոս Մկրտչյանը տեղեկացրեց, որ գարու սերմացուն ձեռք է բերվել Վայոց ձորի թեմի «Սյունիք-զարգացում» և <Շէն> հասարակական կազմակերպությունների կողմից, բաշխումն իրականացվում է Վայոց ձորի մարզպետ Արարատ Գրիգորյանի և Արենի համայնքի ղեկավար Հուսիկ Սահակյանի հետ համագործակցությամբ:

Կորոնավիրուսի հետևանքները մեղմելուն ուղղված արդեն երրորդ թիրախային օժանդակությունն է իրականացվում Հայ Առաքելական Սուրբ Եկեղեցու Վայոց ձորի թեմի և ՀՀ Վայոց ձորի մարզպետարանի համագործակցությամբ:

Կարդալ ավելին

Մայր Աթոռ Սուրբ Էջմիածնի և Վայոց ձորի թեմի աջակցությունը մարզի 172 ընտանիքի


Մայր Աթոռ Սուրբ Էջմիածինը և Վայոց ձորի թեմը, համագործակցելով Վայոց ձորի մարզպետարանի և մարզի 8 համայնքների (6-ը՝ խոշորացված) հետ, կորոնավիրուսի հետևանքով ստեղծված իրավիճակը հաղթահարելու նպատակով մարզի կարիքավոր 4 և ավելի անչափահաս երեխաներ ունեցող ընտանիքներին ցուցաբերեց պարենային սննդի օգնություն:

Օրերս 172 ընտանիքի տրամադրվեց 40կգ-անոց պարենային սննդի փաթեթներ:

Թեմի առաջնորդ Տ. Աբրահամ արքեպիսկոպոս Մկրտչյանի օրհնությամբ պարենային փաթեթների բաշխումը կատարեց Եղեգնաձորի տարածաշրջանի հոգևոր հովիվ Տ. Վազգեն քահանա Հովհաննիսյանը:

Կարդալ ավելին

Ն.Ս.Օ.Տ.Տ. ԳԱՐԵԳԻՆ ԵՐԿՐՈՐԴ ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ ՊԱՏԳԱՄԸ ՄԵՐ ՏԵՐ ՀԻՍՈՒՍ ՔՐԻՍՏՈՍԻ ՍՈՒՐԲ ՀԱՐՈՒԹՅԱՆ ՏՈՆԻ ԱՌԻԹՈՎ


Յանուն Հօր եւ Որդւոյ եւ Հոգւոյն Սրբոյ. ամէն:

«Դու ես Քրիստոս․ կեանք եւ յարութիւն ազգի մարդկան»
(Շարական)

Սիրելի բարեպաշտ ժողովուրդ,
Քրիստոսի Հրաշափառ Հարությունը մեր Սուրբ Եկեղեցու երանաշնորհ հայրերը սքանչելի օրհներգությամբ են փառաբանել գեղեցկահյուս աղոթքներում ու շարականներում՝ բերելով մեր ժողովրդին կյանքի անսպառ հույսի և փրկության ավետիսը. «Դու ես, Քրիստոս, մարդկային ազգի կյանքն ու հարությունը»։

Մեր Տեր Հիսուս Քրիստոս Իր երկրային կյանքի ընթացքում բազում անգամներ հայտնեց Իր չարչարանքների և Հարության մասին, որի իմաստը նույնիսկ առաքյալները հստակությամբ չէին ըմբռնում։ Քրիստոսի խաչելությունից հետո նրանք հուսահատ փակվել էին վերնատան մեջ և տարակուսում էին հավատալ Փրկչի Հարության մասին յուղաբեր կանանց ավետիսին։ Սակայն Հարուցյալ Քրիստոսի հետ հանդիպումից հետո տխրությունը վերափոխվեց Տիրոջ հետ միասնության երանության։ Տիրոջ խաչելության և մահվան հարուցած ցավը փոխակերպվեց Փրկչի հաղթության բերկրանքի, վշտի մռայլ գիշերը՝ հարության տիեզերանորոգ արշալույսի։ Եվ քրիստոնեության լույսն ու վարդապետությունը հաղթականորեն տարածվեցին ողջ աշխարհում՝ մարդկության կյանքն ուղղորդելով դեպի փրկություն ու հավիտենություն։

Քրիստոսի Հարության բերկրալի ավետիսը առանձնակի հուսառատությամբ ու մխիթարությամբ է արձագանքում մտահոգիչ մեր ժամանակներում, երբ մարդկությունը կրում է վիշտ ու տառապանք, զրկանք ու կորուստներ, վերապրում համընդհանուր տագնապ ու ճգնաժամ։ Այս տարվա զատկական կենսանորոգ տոնակատարությունը ողջ աշխարհում բազում հավատացյալներ անցկացնում են մեկուսի, շատեր՝ հեռու իրենց սիրելիներից ու մտերիմներից։ Համավարակի ներկա բարդ պայմաններում նաև մեր եկեղեցիներում առանց հավատացյալների ենք կատարում սրբազան արարողությունները, բայց վստահ ենք, որ դուք, սիրելիներ, հոգով, մտքով ու ձեր աղոթքներով մեզ հետ եք, և միասնաբար ու միասիրտ ենք նշում սքանչելախորհուրդ այս տոնը։ Քրիստոսի Հարությունը մարդկային գոյության նորոգումն է և հավիտենության պարգևը բոլորիս։ «Ես եկա, որպեսզի կյանք ունենան և առավել ևս ունենան»,- ասում է Տերը (Հովհ․ 10․10): Քրիստոսի պարգևած կյանքը մեր առօրեական դժվարություններից ու հոգսերից վեր նոր իրականություն է, ուր Աստծո կամքն է տնօրինվում, ուր Տիրոջ պատվիրաններն ու պատգամները արդյունավորվում են երկնահաճո իրագործումներով, և կյանքի խավարը վերածվում է այգաբացի։

Կարդալ ավելին

Սուրբ Հարության/Զատկի տոն


«Ո՞ւր է մահ, քո հաղթությունը,

գերեզման, ո՞ւր է քո խայթոցը»:

Ովսեի մարգարեության այս ցնծագին բառերը ազդարարում են մեր Տիրոջ՝ Հիսուս Քրիստոսի հրաշափառ Հարությունը:

Հայ Առաքելական Սուրբ Եկեղեցին Ճրագալույցի Պատարագով՝ մեծ ցնծությամբ ավետում է մեր Տիրոջ՝ Հիսուս Քրիստոսի հրաշափառ Հարությունը: Իսկ ինչ է ճրագալույցը: Հայ Առաքելական Սբ. Եկեղեցու 2 մեծագույն՝ Տիրոջ Ծննդյան եւ Հարության տոների նախօրեին, երեկոյան մատուցվում է Սուրբ Պատարագ, որը կոչվում է Ճրագալույցի Պատարագ: Իսկ ճրագալույց բաոը նշանակում է ճրագ լցնել, վաոել: Հնում, մեծագույն տոների նախօրեին, ավելի հանդիսավոր նշելու համար տոնը, եկեղեցին առավել էր զարդարված լինում լույսերով, ճրագներով, հավատացյալները լույսերով էին դիմավորում Տիրոջ հրաշափառ ծնունդն ու հարությունը:

40-օրյա աղոթքի, խոկման եւ պահեցողության երկար ճանապարհը մեզ աոաջնորդեց դեպի Քրիստոսի Հարության լույսը, ինչպես ձմեռային ցուրտ եւ մութ օրերին հաջորդում է գարնանային բնության վերազարթոնքը: Ողջ քրիստոնյա աշխարհի համար մեծագույն տոն է Տիրոջ Հարության տոնը, որ նոր կյանքի ու օրերի հույսով է վերանորոգում յուրաքանչյուրիս հոգին: Հույս, որ ջնջում է մեր մեջ տկար մտածողության պատճառով ի հայտ եկած ամեն կասկած, ամեն շփոթմունք եւ պայծառակերպում է մեր սրտերում երկնային արքայության իրականանալի գաղափարը: Այստեղ տեղին է հիշատակել Օգոստիոնոսի եւ Պողոս առաքյալի խոսքերը.
Օգոստիոնոս.  «Միայն քրիստոնյաներն  են  հավատում  մեռելներից  հարություն  առնելուն,  այդ հավատը  քրիստոնյային…  զատում է  մյուս բոլոր  մարդկանցից…»:  Պողոս առաքյալ.  «Տանջանքը  ոչինչ է  այն երանության հետ,  որ մեզ պետք է հայտնվի»:

Կարդալ ավելին

Ավագ Շաբաթ և Ճրագալույց


Ճրագալույց Սուրբ Հարության

Շաբաթ օրվա երեկոյան, երբ կիրակին լուսանում էր, Մարիամ Մագդաղենացին և մյուս Մարիամը եկան գերեզմանը տեսնելու: Եվ ահա մեծ երկրաշարժ եղավ, որովհետև Տիրոջ հրեշտակը երկնքից իջնելով՝ մոտեցավ, դռնից վեմը մի կողմ գլորեց ու նստեց նրա վրա: Նրա տեսքը փայլակի նման էր, ու նրա զգեստը՝ սպիտակ, ինչպես ձյունը: Նրա ահից պահապանները խռովվեցին և մեռելների պես եղան:

Հրեշտակը խոսեց ու կանանց ասաց.«Դուք մի՛ վախեցեք, գիտեմ,  որ փնտրում էք Հիսուսին, որ խաչվեց այստեղ նա, քանի որ հարություն առավ, ինչպես ինքն ասել էր. եկե՛ք, տեսե՛ք այն տեղը, ուր պառկած էր: Եվ իսկույն գնացե՛ք, ասացե՛ք նրա աշակերտներին, թե հարություն առավ. և ահա նա ձեզնից առաջ գնում է Գալիլիա. այնտեղ նրան կը տեսնե՛ք: Ահա ասացի ձեզ» :

(Մատթեոս 281-8)

Բժշկական դիմակների արտադրությունը Եղեգնաձորում


Հայաստանում և աշխարհում ստեղծված իրադրությանը համապատասխան՝ Վայոց ձորի թեմը և «Սյունիք-Զարգացում» ՀԿ-ն վերջին շաբաթներին աշխատում են արտակարգ ռեժիմով։

Վայոց ձորի թեմի առաջնորդ Տ. Աբրահամ արքեպիսկոպոս Մկրտչյանի և Վայոց ձորի մարզպետ Ա․Գրիգորյանի այցը կարի արտադրամաս

Վայոց ձորի թեմի և «Սյունիք-Զարգացում» ՀԿ-ի աշխատանքային խումբը ուշի ուշով հետևում է իրավիճակին՝ ժամանակին համապատասխան թիրախային օժանդակություն ցուցաբերելու համար։

Դերձակներ՝ Կարապետյան Կարինե, Ալեքսանյան Մարինե, Ստեփանյան Էլլա, Սահակյան Նեռա

Վերջին նախաձեռնությունը Եղեգնաձորում, «Գիտելիք» համալսարանի շենքի տարածքում բժշկական դիմակների արտադրամասի ստեղծումն էր։

«Սյունիք-Զարգացում» ՀԿ-ի աշխատակիցներ

Ընդամենը մի քանի օրվա օրուգիշեր աշխատանքի արդյունքում ձեռք բերվեց անհրաժեշտ ամեն ինչ՝ տարբեր տեսակի գործողությունների համար անհրաժեշտ կարի մեքենաներ, մինչև մոտ 50,000 դիմակ պատրաստելու համար անհրաժեշտ հումք, առանձնացվեց և կահավորվեց ուլտրամանուշակագույն ճառագայթներով վերջնական արտադրանքի ամբողջական ախտահանման (ստերիլիզացման) սենյակ և այլն։

Պահեստավորված անհրաժեշտ պարագաներով սենյակ

Առաջնահերթության կարգով նախ կապահովվեն Եղեգնաձորի և Վայքի հիվանդանոցները, առողջական խնդիրներ ունեցող և բժիշկների խորհրդով ինքնամեկուսացված սոցիալապես անապահով անձինք, այլ կառույցների ու կազմակերպությունների աշխատոողներ և ծառայողներ։

Ուլտրամանուշակագույն սարքով ստերիլիզացված սենյակ

Սիրելի վայոցձորցիներ, վստահ ենք, որ ստեղծված իրավիճակից արժանապատիվ ելք գտնելու համար կարևոր է անձնական պատասխանատվության բարձր գիտակցությունն ու միմյանց հանդեպ հոգատարությունը, պատկան մարմինների՝ իրավիճակից բխող հրահանգների ու հրամանների կատարումը։

Յուրաքանչյուրս վերցնենք պատասխանատվության մեր բաժինը և հաղթահարենք ստեղծված իրավիճակը։
Եվ Աստված մեզ օգնական։

Աղբյուր՝ «Սյունիք-Զարգացում» ՀԿ

Այսօր Բուն Բարեկենդան է


Այսօր՝ փետրվարի 23-ին, Հայ Առաքելական Սուրբ Եկեղեցին նշում է Բուն Բարեկենդանը: Սովորաբար Բարեկենդան է կոչվում շաբաթապահքերի և Մեծ Պահքի նախընթաց օրը: Բարեկենդանին թույլատրվում են չափավոր վայելքներ, խրախճանքներ, խաղեր և ուտեստներ` ի հետևություն Եղիային ուղղված հրեշտակի խոսքի. «Ելիր, կեր, որովհետև երկար ճանապարհ ես գնալուե (Թագ. 19:7): Բարեկենդան բառացի նշանակում է կենդանություն, բարի կյանք:

Հին ժամանակներում Բարեկենդանն ավելի ճոխ է նշվել` խնջույքների սեղանի անբաժան մասն են կազմել մսեղենը, կաթնեղենը, յուղով կերակուրները, պարտադիր կերակրատեսակներից` ամիճը, այսինքն` լցոնած հնդկահավը, փախլավան, նաև բոլորիս հայտնի խաշը: Բարեկենդանի խրախճանքին մասնակցում էին բոլորը. մինչևիսկ չքավորները ուշադրության առարկա էին դառնում և առատապես վայելում էին Բարեկենդանի սեղանը: Իսկ Բարեկենդանի կիրակի գիշերը` ընթրիքից հետո, նախքան քնելը, մածուն ու կաթնապուր էին ուտում և անկողնի մեջ խաշած ձու ուտելով` բերանները փակում էին` մաղթելով, որ Զատկին ձվով բարով բանան իրենց բերանները: Մեծ Պահքն սկսվում է Բուն Բարեկենդանով:

Կարդալ ավելին…

Վայոց ձորի մարզի «Հայոց եկեղեցու պատմություն» առարկայի ուսուցիչների վերապատրաստման դասընթաց


Հայաստանի Աստվածաշնչային ընկերության և Մայր Աթոռ Ս. Էջմիածնի Քրիստոնեական դաստիարակության կենտրոնի համագործակցությամբ փետրվարի 20-ին Եղեգնաձորի «Գիտելիք» համալսարանում կազմակերպվեց Վայոց ձորի մարզի «Հայոց եկեղեցու պատմություն» առարկայի (ՀԵՊ) ուսուցիչների վերապատրաստման սեմինար, որին մասնակցում էին նաև Վայոց ձորի թեմի հոգևորականները:

Սեմինարն սկսվեց աղոթքով:

Տեսնել ավելին

Այսօր Ս. Ղևոնդյանց քահանաների հիշատակության օրն է


Ղևոնդյան քահանաներն Ավարայրի ճակատամարտում սրբացած քաջորդիներն են: Նրանք քայլում էին հայոց բանակի առջևից և իրենց բոցաշունչ խոսքերով քաջալերում, ոգի ու ուժ հաղորդում Քրիստոսի եկեղեցու և հայոց ինքնության համար պարսից զորքերի դեմ ոտքի ելած հայ մարտիկներին:

Տարիքով ավագը Ղևոնդ Երեցն էր, ում անվան կողքին հայ պատմիչները հիշատակում են նաև Հովսեփ կաթողիկոսի, Սահակ եպս. Ռշտունյացի, Բասենյաց Թաթիկ եպիսկոպոսի, Մուշե կամ Մուշեղ քահանայի, Արշեն երեցի, Սամվել քահանայի, Աբրահամ և Քաջաջն սարկավագների անունները: Վարդանանց հերոսամարտից հետո պարսից Հազկերտ արքան վրեժխնդիր եղավ հայոց քաջերից: Նրա հրամանով նահատակվեցին հայոց քաջարի հոգևորականները: Հայ Առաքելական եկեղեցին Ղևոնդյանց սրբերի հիշատակը նշում է բուն բարեկենդանին նախորդող երեքշաբթի օրը:

Տյառնընդառաջի տոնը Ջերմուկի Սուրբ Գայանե եկեղեցում


Հայաստանյայց Առաքելական Սուրբ Եկեղեցին Տյառնընդառաջը կամ 40-օրական Հիսուսի ընծայումը տաճարին տոնում է Աստվածահայտնությունից 40 օր հետո` փետրվարի 14-ին:

Կարդալ ավելին

Տյառնընդառաջի տոնը Մալիշկայի Սուրբ Աննա եկեղեցում


Փետրվարի 13-ին Տյառնընդառաջին նվիրված եկեղեցական արարողություն կատարվեց Մալիշկայի Սուրբ Աննա եկեղեցում, որին ներկա էին եկեղեցու այս տարվա խաչքավոր Օհան Միքայելյանը, համայնքի բնակիչներ և աշակերտներ:

Տեսնել Ավելին

Տյառնընդառաջի տոնը Արենիի Սուրբ Աստվածածին եկեղեցում


Փետրվարի 13-ին Տյառնընդառաջի նախատոնակի հանդիսավոր ժամերգություն կատարվեց Արենիի Սուրբ Աստվածածին եկեղեցում, ապա Վայոց ձորի թեմի փոխառաջնորդ, Նորավանքի վանահայր Տեր Զարեհ վարդապետ Կաբաղյանը բացատրեց տոնի խորհուրդը և օրհնության խոսքով հանդես եկավ:

Տեսնել ավելին

Տյառնընդառաջի տոնը Եղեգնաձորի Սուրբ Աստվածածին եկեղեցում


Փետրվարի 13-ին՝ ժամը 18:00-ին, Եղեգնաձորի Սուրբ Աստվածածին առաջնորդանիստ եկեղեցում տեղի ունեցավ Տյառնընդառաջին նվիրված եկեղեցական արարողություն:

Կարդալ ավելին

ՀՀ Վայոց ձորի մարզպետ Արարատ Գրիգորյանն ամփոփեց Վայոց ձորի մարզպետարանի 2019 թվականի տարեկան և իր պաշտոնավարման հարյուրօրյա գործունեության արդյունքները


2020 թվականի փետրվարի 7-ին  Վայոց ձորի մարզպետ Արարատ Գրիգորյանը հանդես եկավ  ՀՀ Վայոց ձորի  մարզպետարանի  2019  թվականի  տարեկան    և իր պաշտոնավարման հարյուրօրյա գործունեության արդյունքների ամփոփմանը նվիրված մամուլի ասուլիսով:

    Ասուլիսը կայացավ մարզպետի աշխատասենյակում, որին մասնակցում էին Հ1 հեռուստաընկերության,  Վայոց ձորի թեմի  պաշտոնական կայքի և <<Վարդաձոր>> մարզային էլեկտրոնային լրատվամիջոցի ներկայացուցիչներ և մարզում գործող մի խումբ հասարակական կազմակերպությունների ղեկավարներ:

Կարդալ ավելին

ՀՀ Վայոց ձորի մարզպետի կողմից 2019 թվականի ընթացքում կատարած աշխատանքների վերաբերյալ


    Մարզպետը օրենսդրությամբ իրեն վերապահված լիազորությունների շրջանակում ապահովվել է ՀՀ օրենքների, Հանրապետության Նախագահի հրամանագրերի, ՀՀ կառավարության և վարչապետի որոշումների, ինչպես նաև այլ նորմատիվ իրավական ակտերի կատարումը: 2019 թվականին մարզպետի կողմից ընդունվել են 61 որոշումներ և 156 կարգադրություններ, աշխատակազմի ղեկավարի կողմից արձակվել են 267հրամաններ:

2019թ հունվարի 11-ի թիվ 1 որոշմամբ մարզպետի և ազգաբնակչության անմիջական կապը ամրապնդելու նպատակով ամենամսյա ընդունելությունները են իրականացվել մարզպետարանում և համայնքներում, իսկ բարձրացված խնդիրները ուսումնասիրվել են տեղում: 2019 թվականին մարզպետի մոտ կատարվել է 1060 քաղաքացիների ընդունելություն:

Հաշվետու ժամանակաշրջանում համագործակցված աշխատանքներ են տարվել տեղական ինքնակառավարման մարմինների և պետական կառավարման համակարգի մարմիննների հետ: Հետևողական միջոցներ են ձեռնարկվել մարզի համայնքների 2019 թվականի տարեկան աշխատանքային պլանների հաստատման ուղղությամբ, որոնք բխել են համայնքների զարգացման ծրագրերից:

Կարդալ ավելին

Երիտասարդների օրհնության կարգ Արենիի Սուրբ Աստվածածին եկեղեցում


Փետրվարի 8-ին Սուրբ Սարգսի տոնի կապակցությամբ երիտասարդաց օրհնության կարգ կատարվեց Արենիի Սուրբ Աստվածածին եկեղեցում:

Առավոտյան ժամերգությունից և օրհնության կարգից հետո տոնի խորհուրդը հանգամանալից ներկայացրեց Վայոց ձորի թեմի փոխառաջնորդ, Նորավանքի վանահայր Տ. Զարեհ վարդապետ Կաբաղյանը:

Արենիի համայնքապետարանի մշակույթի բաժինը անակնկալ էր պատրաստել երիտասարդների համար:

Արենիի մշակույթի տանը օրվա խորհրդին նվիրված ֆիլմի ցուցադրություն և հյուրասիրություն եղավ ներկա երիտասարդների համար:

Թող արագահաս Սուրբ Սարգիսը պահապան և բարեխոս լինի մեր երիտասարդներին և զինվորներին:

Երիտասարդների օրհնության կարգ Եղեգնաձորի առաջնորդանիստ Ս. Աստվածածին եկեղեցում


Փետրվարի 8-ին Հայ Առաքելական Սուրբ Եկեղեցին նշում է Ս. Սարգսի տոնը: Տոնակատարությունն սկսվեց փետրվարի 7-ին Եղեգնաձորի առաջնորդանիստ Սուրբ Աստվածածին եկեղեցում կատարված երեկոյան ժամերգությամբ, որի ավարտին Եղեգնաձորի տարածաշրջանի հոգևոր հովիվ Տեր Վազգեն քահանա Հովհաննիսյանը կատարեց Սուրբ Սարգսի տոնի նախատոնակը, ապա Արժանապատիվ Տեր Հայրը հավուր պատշաճի քարոզ խոսեց:

Այնուհետև եկեղեցի եկած երիտասարդներին բաժանվեցին տոնը խորհրդանշող աղի բլիթներ , որոնք պատրաստվել էին Վայոց ձորի տարածաշրջանի պետական քոլեջի ուսանողների կողմից:

Փետրվարի 8-ին՝ Սուրբ Սարգսի տոնի օրը, երիտասարդները մասնակցեցին Ս. Աստվածածին եկեղեցում կատարված երեկոյան ժամերգությանը, որի ավարտին Տեր Վազգենը քարոզ խոսեց՝ մեկնաբանելով տոնի խորհուրդն ու ներկայացնելով Ս. Սարգսի վարքը:

Թող Սուրբ Սարգիս Զորավարը զորավիգ լինի մեր ազգին և բարեխոս լինի մեր սիրելի երիտասարդներին:

Երիտասարդների օրհնության կարգ Ջերմուկի Ս. Գայանե եկեղեցում


Փետրվարի 7-ին` հավարտ երեկոյան ժամերգության, Ջերմուկի Եկեղեցասիրած միության անդամները բլիթներ բաժանեցին եկեղեցի այցելած երիտասարդներին:

Փետրվարի 8-ին՝ Սուրբ Սարգսի տոնի օրը, Սբ. Գայանե եկեղեցում Երիտասարդների օրհնության կարգ կատարեց Ջերմուկի տարածաշրջանի հոգևոր հովիվ Տեր Գալուստ քահանա Սահակյանը, ով հավուր պատշաճի քարոզ խոսեց:

Սուրբ Ծննդյան արարողությունները Ջերմուկի Ս. Գայանե եկեղեցում


Հունվարի 5-ին Ջերմուկի Ս. Գայանե եկեղեցում մատուցվեց Ս. Ծննդյան Ճրագալույցի Ս. Պատարագ: Պատարագիչն էր Ջերմուկի տարածաշրջանի հոգևոր հովիվ Տ. Գալուստ քհն. Սահակյանը:

Հունվարի 6-ին մատուցվեց Սուրբ Ծննդյան Ս. Պատարագը և տրվեց Սուրբ Ծննդյան ավետիսը`Քրիստոս ծնավ և հայտնեցավ: Մեզ և Ձեզ մեծ ավետիս: Օրհնյալ է հայտնությունը Քրիստոսի:

Այս տարվա խաչքավորի պատվավոր դերը ստանձնեց համայնքապետ Վարդան Հովհաննիսյանը:

Անահիտ Եղիազարյան

Միջոցառում Վայոց ձորի թեմի առաջնորդարանում


Հունվարի 13-ին Վայոց ձորի թեմի առաջնորդարանում կազմակերպվել էր Նոր տարվա և Սուրբ Ծնունդին նվիրված միջոցառում Եղեգնաձորի Ցերեկային խնամքի կենտրոնի երեխաների համար /շուրջ 25 երեխա/։

Մասնակցում էր թեմի փոխառաջնորդ, Նորավանքի վանահայր Տ. Զարեհ վրդ. Կաբաղյանը, Վայոց ձորի մարզպետի խորհրդական Անի Մխիթարյանը, Եղեգնաձորի քաղաքապետարանի սոց. աշխատող Անի Առաքելյանը, ծնողներ, հյուրեր։

Հոգեշնորհ Հայր Սուրբը ներկաներին փոխանցեց Վայոց ձորի թեմի առաջնորդ Տ. Աբրահամ արքեպս. Մկրտչյանի օրհնությունը և ամանորյա նվերները:

Երեխաներն իրենց երաժշտական և պարային կատարումներով առավել գեղեցկացրին հանդիսությունը:

Սուրբ Ծննդյան արարողությունները Վայքի Ս. Տրդատ եկեղեցում


Վայքի Սուրբ Տրդատ եկեղեցում տեղի ունեցավ Սուրբ Ծննդյան և Աստվածհայտնության տոնական Սուրբ Պատարագը: Պատարագիչն էր Վայքի տարածաշրջանի հոգևոր հովիվ Տ. Սեպուհ քհն. Հարությունյանը:

Ս. Պատարագին իրենց մասնակցությունն ունեցան մոտակա զորամասի զինծառայողները, ովքեր հնարավորություն ունեցան հաղորդվելու Տիրոջ կենարար մարմնին ու արյանը և մասնակցելու Ջրօրհնեքի արարողությանը:

Գագիկ սարկավագ Հակոբյան

ՀՀ Զինված ուժերի գնդերեց

Ջրօրհնեքի արարողություն Մալիշկայի Ս. Աննա եկեղեցում


Հունվարի 6-ին Մալիշկայի ՍԱննա եկեղեցում տեղի ունեցավ Ջրօրհնեքի արարողություն, որի ավարտին Եղեգնաձորի տարածաշրջանի հոգևոր հովիվ Տ. Վազգեն քահանա Հովհաննիսյանը բացատրեց օրվա խորհուրդը:

Արարողությանը ներկա էին Մալիշկա համայնքի ղեկավար Գարիկ Նազարյանը, եկեղեցու այս տարվա խաչքավոր Օհան Միքայելյանը և համայնքի բնակիչներ:

Վերջում օրհնված ջուրը բաժանվեց հավատացյալ ժողովրդին:    

Թող Ամենակալ Աստված զորացնի եկեղեցու խաչքավորին՝ իր նվիրական առաքելության մեջ:

Կանադայի հայոց թեմի օգնությունը սահմանամերձ Սերս, Բարձրունի և Նոր Ազնաբերդ համայնքներին


Ինչպես նախորդ տարի, այս տարի ևս, Ամանորի շեմին Սերս, Բարձրունի և Նոր Ազնաբերդ

բնակավայրերի սահմանապահ ընտանիքների սոցիալական բեռի թեթևացմանն օժանդակում է Կանադայի հայոց թեմը:

ՀՀ Վայոց ձորի թեմի առաջնորդ Տ. Աբրահամ արքեպս. Մկրտչյանի օրհնությամբ և Կանադայի թեմի առաջնորդ Տ. Աբգար Եպիսկոպոս Յովակիմյանի գլխավորությամբ Կանադահայոց Թեմի «Հայաստանի Երեխաներու Հիմնադրամի» վարչական կազմի անդամների կողմից կազմակերպվել է դրամահավաք և ուղարկվել Վայոց ձորի սահմանային գյուղերին:

Ուղարկված գումարը և ամանորյա տոպրակները սահմանամերձ գյուղերի բնակիչներին  բաժանել են Եղեգնաձորի հոգևոր հովիվ Տ. Վազգեն քահանա Հովհաննիսյանը  և թեմի գլխավոր հաշվապահ Անահիտ Դովլաթյանը:

Սուրբ Ծննդյան արարողությունները Նորավանքում


Հունվարի 6-ին  Նորավանքում մատուցվեց Սուրբ և Անմահ Պատարագ: Օրվա պատարագիչն էր Վայոց ձորի թեմի փոխառաջնորդ, Նորավանքի վանահայր Հոգեշնորհ Տ. Զարեհ վարդապետ Կաբաղյանը:

 Ս. Պատարագի ընթացքում Հայր Սուրբն ընթերցեց Ն. Ս. Օ. Տ. Տ. Գարեգին Ամենայն Հայոց Կաթողիկոս և Ծայրագույն Պատրիարքի Սուրբ Ծննդյան պատգամը:

Հավարտ Ս. Պատարագի կատարվեց Ջրօրհնեքի արարողությունը: Այս տարի Նորավանքի խաչքավորն է Վասիլ Ալեքսանովը: Խաչքավորի կողմից Նորավանքում գտնվող ժողովրդին բաժանվեց գաթաներ, և շատերն ուրախությամբ մասնակցեցին նաև նրա նախաձեռնած ընդունելությանը:

Թող Տերն օրհնի բոլորին և բոլորի ուխտն ի կատար ածի: Թող Բեթղեհեմի Տիրոջ աստղի լույսն առաջնորդի մեր ազգին հաղթական ճանապարհներով, և թող Ամենակալ Աստված զորացնի մեր խաչքավորին՝ իր նվիրական առաքելության մեջ:

Սուրբ Ծննդյան արարողությունները Եղեգնաձորի առաջնորդանիստ Ս. Աստվածածին եկեղեցում


Հունվարի 6-ին՝ մեր Տիրոջ՝ Հիսուս Քրիստոսի հրաշափառ Ծննդյան տոնի օրը, Եղեգնաձորի առաջնորդանիստ Ս. Աստվածածին եկեղեցում մատուցվեց Ս. և Անմահ Պատարագ, որին ներկա էին Եղեգնաձորի քաղաքապետ Դավիթ Հարությունյանը, եկեղեցու այս տարվա խաչքավոր Արտակ Վարդանյանը և բազմաթիվ վայոցձորցիներ:

Պատարագիչն էր Եղեգնաձորի տարածաշրջանի հոգևոր հովիվ Տ. Վազգեն քահանա Հովհաննիսյանը:

Արժանապատիվ Տեր Հայրը Ս. Պատարագի ընթացքում ընթերցեց Ն. Ս. Օ. Տ. Տ. Գարեգին Բ Ամենայն Հայոց Կաթողիկոս և Ծայրագույն Պատրիարքի Ս. Ծննդյան պատգամը:

Հավարտ Ս. Պատարագի տեղի ունեցավ Ջրօրհնեքի հոգեպարար արարողությունը:

Վերջում օրհնված ջուրը բաժանվեց հավատացյալ ժողովրդին:

Թող Ամենակալ Աստված զորացնի եկեղեցու խաչքավորին՝ իր նվիրական առաքելության մեջ:

Ն.Ս.Օ.Տ.Տ. ԳԱՐԵԳԻՆ Բ ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ ՊԱՏԳԱՄԸ ՄԵՐ ՏԵՐ ՀԻՍՈՒՍ ՔՐԻՍՏՈՍԻ ՍՈՒՐԲ ԾՆՆԴՅԱՆ ԵՎ ԱՍՏՎԱԾԱՀԱՅՏՆՈՒԹՅԱՆ ՏՈՆԻ ԱՌԻԹՈՎ


Յանուն Հօր եւ Որդւոյ եւ Հոգւոյն Սրբոյ. ամէն:

«Երբ ժամանակը լրումին հասավ, Աստված ուղարկեց Իր Որդուն,
… որպեսզի մենք որդեգրություն ընդունենք» (Գաղ. Դ. 4-5):


Սիրելի հավատավոր, բարեպաշտ ժողովուրդ,
Առ Աստված փառաբանությունը Մեր սրտում՝ ողջունում ենք ձեզ Քրիստոսի Սուրբ Ծննդյան կենսաբեր ավետիսով. «Քրիստոս ծնաւ և յայտնեցաւ»: Փրկչի Սուրբ Ծննդյան տոնը քրիստոնյա ողջ աշխարհին խնդություն ու բերկրանք է բերում: Այսօր մեր սրտերում ու հոգիներում այդ ուրախությունն է թևածում, որով համախմբվել ենք օրհնաբանելու Մանուկ Հիսուսի Սուրբ Ծնունդը, նորոգվելու Քրիստոսի պարգևած կենարար շնորհներով:

«Երբ ժամանակը լրումին հասավ, Աստված ուղարկեց Իր Որդուն, …որպեսզի մենք որդեգրություն ընդունենք»,- ասում է առաքյալը: Մարդկային մտքի համար դժվար ընկալելի է, թե ինչպես կարող է անսահման Աստված սահմանավորվել, Արարիչն Աստված արարված մարդու կերպարանք առնել: Մեր պատմահայր Սուրբ Մովսես Խորենացին Քրիստոսի Սուրբ Ծննդյան այս հրաշազարդ իրողությունը իր գեղեցկահյուս շարականում կոչում է «Խորհուրդ մեծ և սքանչելի»:

կարդալ ավելին
Image

Ս. Ծննդյան Ճրագալույցի Սուրբ և Անմահ Պատարագ Եղեգնաձորի առաջնորդանիստ Ս. Աստվածածին եկեղեցում


Հունվարի 5-ին Եղեգնաձորի առաջնորդանիստ Ս. Աստվածածին եկեղեցում, հանդիսապետությամբ Վայոց ձորի թեմի փոխառաջնորդ, Նորավանքի վանահայր Տ. Զարեհ վրդ. Կաբաղյանի, Եղեգնաձորի տարածաշրջանի հոգևոր հովիվ Տ. Վազգեն քահանա Հովհաննիսյանը մատուցեց Ս. Ծննդյան Ճրագալույցի Սուրբ և Անմահ Պատարագ: Արժանապատիվ Տեր Հայրը Ս. Պատարագի ընթացքում հանդես եկավ հավուր պատշաճի քարոզով՝ մեկնաբանելով տոնի խորհուրդը:

«Մարզի զարգացումը քո համայնքից» խորագրով եռօրյա հանդիպում-քննարկում


Քննարկումն իրականացվել է “Սյունիք-Զարգացում” ՀԿ-ի Սոցիալական ծրագրի շրջանակում ՀՀ Վայոց ձորի մարզպետարանի և Հայ Առաքելական Եկեղեցու Վայոց ձորի թեմի հետ համագործակցաբար։


Ողջույնի խոսքով հանդես եկան ՀՀ Վայոց ձորի մարզպետ Արարատ Գրիգորյանը՝ շեշտադրելով Վայոց ձոր մարզում զարգացման հեռանկար ունեցող երկու ոլորտների՝ գյուղատնտեսության և տուրիզմի զարգացման հնարավորությունների մասին և Վայոց ձորի թեմի առաջնորդ Գերաշնորհ Տեր Աբրահամ արքեպիսկոպոս Մկրտչյանը՝ նշելով․ «Երբեք չպիտի մեզ հանգիստ զգանք, որովհետև շրջապատված ենք մարտահրավերներով։ Պետք է բոլորս միասին մեր հնարավորությունը ներդնենք՝ մեր մարզի, մեր երկրի զարգացմանը։ Պետք է իրապես օր ու գիշեր աշխատենք և ես ուրախ եմ, որ այսօր այդ աշխատանքին լծված շատ մարդիկ կան»։


Պաշտոնական բացումից հետո “Սյունիք-Զարգացում” ՀԿ ծրագրերի ղեկավարը ներկայացրեց կազմակերպության սոցիալական ծրագիրը:
Այնուհետև հրավիրյալ խոսնակները ներկայացրին համայնքային զարգացմանը նպաստող մի շարք ելակետային սկզբունքներ։

ՀՀ վարչապետի խորհրդական Ռ․ Ղուկասյանը խոսեց համայնքների մարդակենտրոն զարգացումից, ներհամայնքային զարգացման պլանների մասին բնակիչներին տեղեկացնելու և նրանց հետ քննարկելու մասին, համայնքային զարգացման ռազմավարության, ՏԱՊ-երում համայնքային ծրագրերն ըստ առաջնահերթությունների, ոլորտային խնդիրների լուծման տրամաբանական կապի մասին:

ԱՎԵԼԻՆ

Արենի համայնքում կայացավ խաչի օծման Սուրբ արարողություն


Արենի համայնքի Աղավնաձոր բնակավայրերի Ուլգյուր հանդամասում Հակոբջանյանների ընտանիքի կողմից տեղադրվել է երկաթե լուսավորվող խաչ։ Նոյեմբերի 23- ին կայացավ խաչի օծման Սուրբ արարողությունը, որին ներկա էին Վայոց ձորի մարզպետ Արարատ Գրիգորյանը, Արենի համայնքի ղեկավար Հուսիկ Սահակյանը, այլ բարձրաստիճան հյուրեր։ համայնքի ղեկավարը իր շնորհակալությունը հայտնեց Նորիկ Հակոբջանյանին այս աստվածահաճո գործի համար և հանձնեց շնորհակալագիր։

ավելին

Եղեգնաձորի երաժշտական դպրոցում մեծ շուքով նշվեց Կոմիտասի ծննդյան 150 ամյակը


Դպրոցի հարևանությամբ տեղադրվեց Վան Եղյանի հեղինակած քանդակը, որին նոր կյանք է տվել քարագործ վարպետ Մարատ Կարապետյանը: Բացման խոսքով հանդես եկավ Վայոց ձորի մարզպետ Ա. Գրիգորյանը:

Միջոցառման համերգային մասը շարունակվեց Ֆ. Բալոյանի անվան համերգասրահում:Համերգին մասնակցեցին` ՀՀ լավագույն բլուլահար Ավագ Մարգարյանը, Եղեգնաձորի երաժշտական դպրոցի և Ջերմուկի Շառլ Ազնավուրի անվան արվեստի դպրոցի ուսուցիչների երգչախմբերը, Եղեգնաձորի երաժշտական դպրոցի և Մշակույթի կենտրոնի մանկական երգչախմբերը, Եղեգնաձորի երաժշտական դպրոցի ուսուցիչներ և աշակերտներ:

ԱՎԵԼԻՆ

ՀՀ պաշտպանության նախարարն ընդունել է բարերար Վիգեն Կարապետյանին


Նոյեմբերի 23-ին ՀՀ պաշտպանության նախարար Դավիթ Տոնոյանն ընդունել է Կալիֆորնիայի հայ ատամնաբույժների միության անդամ, ամերիկահայ բարերար Վիգեն Կարապետյանին։

Պաշտպանական գերատեսչության ղեկավարը շնորհակալություն է հայտնել բարերարին 25-ամյա ակտիվ բարեգործական գործունեության համար, որի շրջանակներում իրականացվել են մի շարք սոցիալական ծրագրեր հանրապետության մարզերում, աջակցություն է ցուցաբերվել զոհված և վիրավորված զինծառայողների ընտանիքներին։

ԱՎԵԼԻՆ

Այսօր Ն.Ս.Օ.Տ.Տ. Գարեգին Բ Ամենայն Հայոց Կաթողիկոս և Ծայրագույն Պատրիարքի օծման և գահակալության 20-րդ տարեդարձն է


Ի խորոց սրտի շնորհավորում ենք Վեհափառ Տիրոջը և մաղթում, որ Ահարոնի ծաղկյալ գավազանով Վեհափառ Հայրապետը հովվի աշխարհասփյուռ հայությանը, և գահակալության երկայն տարիները թող հաջորդեն իրար՝ արդյունավորվելով հայրապետական նորանոր իրագործումներով՝ ի փառս Աստծու, Հայաստանյայց Առաքելական մեր Սուրբ Եկեղեցու և համայն մեր ժողովրդի:

Հայրապետական մաղթերգ. Ամենհայի

ԱՎԵԼԻՆ

Հայտարարություն


Սիրելի՛ հայորդիներ, Վաղը՝ Խաչի Գյուտի տոնի օրը, Արկազի Սուրբ Խաչ վանքում տոնի առիթով կմատուցվի Սուրբ և Անմահ Պատարագ: Սուրբ Պատարագի սկիզբը՝ ժամը 11:00:

ՏՈՆ ԽԱՉԻ ԳՅՈՒՏԻ


Ըստ  տոնացուցային ընթացքի` Խաչին նվիրված վերջին` չորրորդ տոնն է Խաչի գյուտը: Այն թե’ ժամանակային և թե’ իմաստային առումներով հաջորդում է Վարագա խաչի տոնին, քանի որ նվիրված է Խաչափայտի երկրորդ գյուտին և տոնվում է Վարագա խաչի տոնից հետո:

Խաչի գյուտը միաժամանակ սերտորեն կապված է Խաչվերացի տոնի հետ, քանի որ Խաչվերացի տոնի նախընթաց և հաջորդող օրերը հարաբերվում են Խաչափայտի երկրորդ գյուտի և դրանից հետո Հեղինե թագուհու կառուցած եկեղեցիների հիշատակության հետ:

Խաչի այս երկրորդ գյուտը տեղի է ունենում 327թ., երբ Երուսաղեմ է գալիս Կոստանդիանոս Մեծի մայրը` Հեղինե թագուհին: Իմանալով, որ Երուսաղեմի Հուդա անունով բնակիչներից մեկը գիտի Խաչափայտի տեղը` նրա օգնությամբ գտնում է Սուրբ Խաչը, որը Խաչի առաջին գյուտից հետո տարել և թաղել էին Գողգոթայի աղբյուսներում:

Հեղինեն երբ պահանջում է փորել այդ աղբյուսները, գործավորները խուսափում, ապա և դժկամությամբ դանդաղորեն են աշխատում, ուստի Հեղինե թագուհին պատվիրում է այդ աղյուսների վրա ոսկի և արծաթ լցնել, որպեսզի դրանք վերցնելու համար փորեն և խորանան ներքև, որից հետո <<պեղեցին վաղվաղակի>>: Այս պատմության մեջ ևս ասվում է, որ երեք խաչափայտերը միասին են գտնվում, և դարձյալ մեռյալին հպելով են պարզում, թե որն է Քրիստոսինը:

Ասվում է, որ  երբ գտնվում են երեք խաչափայտերը, այդ ժամանակ մի մահացած պատանու էին տանում թաղելու, և Հուդան, մոտենալով այդ պատանու դագաղին, ասում է . <<Տէ՛ր իմ, Յիսուս Քրիստոս, մարդացեալ Բանդ Աստուած, ի Սուրբ Մարիամայ, ցոյց արդ զզօրութիւն Սրբոյ Խաչի Քո փրկականի առաջի թագուհոյն և բազմամբոխ ժողովրդեանս>> (Յայսմաւուրք, էջ 573):

Continue reading

“Հզոր հայրենիք” բարեգործական ատամնաբուժարան


Վայոց ձորի թեմի և «Սյունիք-զարգացում» ՀԿ-ի երկարատև աշխատանքի շնորհիվ է, որ «Հզոր հայրենիք» բարեգործական ատամնաբուժարան ծրագիրը կյանքի կոչվեց։

Ծրագրի բացման արարողությունը տեղի ունեցավ այսօր Վայոց ձոր մարզի Արենի համայնքի սահմանամերձ Խաչիկ բնակավայրում։ Բացման արարողությանը ներկա էին Վայոց ձորի թեմի առաջնորդ գերաշնորհ Տեր Աբրահամ արքեպիսկոպոս Մկրտչյանը, ՀՀ ԶՈՒ հոգևոր առաջնորդ Տեր Վրթանես եպիսկոպոս Աբրահամյանը, Արենի համայնքի ղեկավար Հուսիկ Սահակյանը, ներկայացուցիչներ Պաշտպանության և Առողջապահության նախարարություններից, և «Սյունիք-զարգացում» ՀԿ-ից։

Աբրահամ արքեպիսկոպոս Մկրտչյանը ողջույնի խոսքում նշեց որ այս ծրագրի իրականացումը Վայոց ձորի թեմի և «Սյունիք-զարգացում» ՀԿ-ի մի քանի տարվա աշխատանքի և ներդրումների արդյունք է, շնորհակալություն հայտնեց նաև Վիգեն Կարապետյանին, Կարո Գևորգյանին և մի շարք ամերիկահայ բարերարների, որոնք շարունակական աջակցություն են բերելու  այս նախաձեռնությանը:  Ծրագիրը կրելու է շարունակական բնույթ և միտում ունի ընդլայնվելու։

ԱՎԵԼԻՆ