ԶԱՆԳԻ ԽՈՐՀՈՒՐԴԸ. ՆՈՐ ԶԱՆԳԵՐԻ ՕԾՈՒՄԸ


Զանգն այսօր էլ անբաժան է Հայոց Եկեղեցու ծիսակատարություններից: Զանգի ձայնը զարմանալի ազդեցություն ունի մարդու վրա: Տխրության պահին այն թախծալից է, իսկ ուրախության ժամանակ՝ ուրախալի: Զանգ օգտագործելու բուն նպատակը  եկեղեցական արարողությունների ժամանակ հավատացյալ ժողովրդին եկեղեցի հրավիրելն է: Հարկ եղած դեպքում զանգը, ինչպես և կոչնակը, ազդարարել է գույժեր: Այն հնուց ծառայել է բնակչությանը համախմբելու, զորք հավաքելու (ահազանգ):

Եկեղեցու զանգը միաժամանակ խորհրդանշում է նաև հրեշտակների փողը, որը բոլորին հրավիրելու է Աստծո արդար դատաստանին: Զանգեր հնչեցվում են նաև եկեղեցի ննջեցյալ բերելու, իսկ ավելի հաճախ` Հայրապետական թափորի, առաջնորդի կամ բարձրաստիճան հոգևորականների ժամանման առիթով:

Վաղնջական ժամանակներից մինչև մեր օրերը ամենատևական զանգահարումը կատարվել է 1918 թ.-ին՝ Սարդարապատի մայիսյան հերոսամարտի ժամանակ, երբ յոթ օր անընդմեջ ղողանջում էին Արարատյան դաշտի և մերձակա շրջանների հայկական եկեղեցիների զանգերը`ազդարարելով մահու և կենաց կռիվը:

Զանգի ձայնն առավել հզոր ու զրնգուն դարձնելու համար անհրաժեշտ է, որ այն կախվի բարձր ու բաց տեղում: Հենց այս նպատակին էլ ծառայում են զանգակատները, որոնք սովորաբար կառուցվում են եկեղեցու հարևանությամբ կամ եկեղեցու արևմտյան ճակատին կից: Զանգերը հատուկ օծման և օրհնության կարգ ունեն   Հայ Առաքելական Սուրբ Եկեղեցու «Մաշտոց» ծիսամատյանում:

Օրերս օծվեցին Եղեգնաձորի Սուրբ Աստվածածին եկեղեցու և Նորավանքի  նոր զանգերը՝ ձեռամբ Վայոց Ձորի թեմի առաջնորդ գերաշնորհ Տեր Աբրահամ եպիսկոպոս Մկրտչյանի:   Այդ  հիշարժան արարողության ավարտին ելույթ ունեցավ  թեմակալ առաջնորդ Աբրահամ Սրբազանը, ով իր շնորհակալական խոսքն ասաց մեր հայրենակից Հրաչյա Գրիգորյանին, ում հովանավորությամբ ձեռք բերվեցին այդ 2 զանգերը և Ռուսաստանի Դաշնությունից տեղափոխվեցին Հայաստան:

This slideshow requires JavaScript.

Ներկաների թվում էին Տեր Զարեհ վարդապետ Կաբաղյանը, Եղեգնաձորի տարածաշրջանի հոգևոր հովիվ Տ. Վազգեն քահանա Հովհաննիսյանը, Մայր Աթոռ Սուրբ Էջմիածնի Վայոց Ձորի ՔԴԿ-ի պատասխանատու Հուսիկ Հարությունյանը, Եղեգնաձորի դպրոցների աշակերտներ, բնակիչներ և այլք: Զանգերի օծումից հետո դրանք կախվեցին  զանգակատներում:

Զանգերի հնչյունների կոչն է մասնակցել եկեղեցական արարողություններին, համախմբվել և հաղորդակցվել երկնքի հետ սրբազան ձայնով:

Սիրան Սարգսյան

                                                                                Վայոց Ձորի թեմի ՔԴԿ-ի
լրատվության բաժին

 

Advertisements

ՎԵՐՋԻՆ ԶԱՆԳ


    

ՎԵՐՋԻՆ ԶԱՆԳԸ ՄԱԼԻՇԿԱՅԻ ԹԻՎ 1 ՄԻՋՆ. ԴՊՐՈՑՈՒՄ

Ավարտվեց ևս մեկ ուսումնական տարի: Վերջին զանգի ղողանջների ներքո իրենց 12 տարիների դպրոցական կյանքը մեկ ակնթարթում ամփոփեցին Վայոց Ձորի մարզի Մալիշկա գյուղի 2 դպրոցների շրջանավարտները:

ժամը 9:30-ին Մալիշկայի թիվ 1 միջն. դպրոցի դահլիճում տեղի ունեցավ վերջին զանգի միջոցառում, որին ներկա էին դպրոցի տնօրեն Արմեն Մարգարյանը, դասղեկ Գոհար Մուրադյանը,  12-րդ դասարանի աշակերտների դասվարները, ուսուցիչներ, աշակերտներ, ծնողներ և այլք:

Դասղեկի նախաձեռնությամբ շրջանավարտները կազմակերպել էին գեղեցիկ միջոցառում՝ երգ ու պարով, ասմունքով ու հումորով: Նրանք հրաժեշտի իրենց խոսքերն ասացին, մի քանիսը` արցունքախառն աչքերով:

This slideshow requires JavaScript.

Հուզված էին թե՛ ուսուցիչները, և թե՛ աշակերտներն ու ծնողները: Յուրաքանչյուրի աչքերում երևացող արցունքները հավաստում էին, որ ամեն մի ծնող մտքերով թևածում է հեռուներում՝ մտորելով իր երեխայի ապագայի շուրջ:

Մալիշկա գյուղի գյուղապետ պարոն Մհեր Մովսիսյանն իր ֆինանսական աջակցությունն էր ցույց տվել գյուղի 2 դպրոցների շրջանավարտներին:

Շրջանավարտներին շնորհավորանքի ու մաղթանքի խոսքեր ասացին դպրոցի տնօրեն Արմեն Մարգարյանը, դասղեկը, ուսուցիչներն ու ծնողները:

Վերջին զանգը

<< Գիտելիք>> համալսարանի ավագ դպրոցում

Ժամը 11:00-ին Եղեգնաձորի  <<Գիտելիք>> համալսարանի ավագ դպրոցի շրջանավարտները նույնպես կազմակերպել էին ավարտական միջոցառում: Նրանք հիշեցին դպրոցական հետաքրքիր դրվագներ, ներկայացրին հումորային մանրապատումներ, հնչեցրին ուսուցիչներին գովերգող ամենաջերմ բարեմաղթանքներ: Նրանք  իրենց երախտագիտությունը հայտնեցին  ուսուցիչներին` տարիների ընթացքում ձեռք բերած հարուստ գիտելիքների համար,  որը կօգնի  կյանքի դպրոցում ավելի խոհեմ և առաջադեմ լինել:

This slideshow requires JavaScript.

Ավարտական միջոցառմանը ներկա էին Վայոց Ձորի թեմի առաջնորդ Տ. Աբրահամ եպիսկոպոս Մկրտչյանը, <<Գիտելիք>> համալսարանի ավագ դպրոցի տնօրեն Գնել Դովլաթյանը, ուսուցիչներ, դասախոսներ, ուսանողներ, շրջանավարտների ծնողներն ու հարազատները:

Թեմակալ առաջնորդ Աբրահամ Սրբազանը բարի երթ մաղթեց շրջանավարտներին: Շրջանավարտները տոնական օրվա առթիվ իրենց սիրելի ուսուցիչներին ծաղիկներ նվիրեցին: Հնչեցին շնորհավորանքի ու բարեմաղթանքի խոսքեր: Continue reading