ԱՐԿԱԶԻ ՍՈՒՐԲ ԽԱՉ ՎԱՆՔ


Խաչվերացը Վայոց Ձորի տարածքում համարվում է Սուրբ Խաչ վանքի ուխտի օր, ինչը հատկանշական է նրանով, որ վանքի հարավ-արևելյան ավանդատանն ամփոփված է Հիսուս Քրիստոսի  խաչելության փայտի մասունք, ինչի պատճառով էլ վանքը կոչվում է Սուրբ Խաչ:

This slideshow requires JavaScript.

Վայոց Ձորի մարզի Վերնաշեն գյուղից 7 կմ դեպի արևելք գտնվում է Արկազի Ս.Խաչ վանքը, որը Վայոց Ձորի նշանավոր ուխտատեղիներից է և հիշատակվում է 8-րդ դարից: Վանքի վերջին վերանորոգությունն ավարտվել է 2011թ.-ին` բարերարությամբ Վարդան Հայրապետյանի, և  մեծ հանդիսավորությամբ վերաօծվել է սեպտեմբերի 11-ին՝ Խաչվերացի տոնի օրը, Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի ձեռամբ: Վանքին կից կառուցվել է նաև հանդիսությունների նոր սրահ:

Advertisements

ԵՎՍ ՄԵԿ ԱՆՄՈՌԱՆԱԼԻ ՈՒԽՏԱԳՆԱՑՈՒԹՅՈՒՆ


Վայոց Ձորի թեմի Երիտասարդաց միությունը  սեպտեմբերի 7-ին կազմակերպեց ուխտագնացություն դեպի Գեղարքունիքի և Լոռու մարզեր: Ուխտավորների խումբը նախ այցելեց Հայրավանքի Ս. Ստեփանոս եկեղեցին, որը կառուցվել է 4-րդ դարում, ունի քառակոնք կենտրոնագմբեթ հորինվածք և համարվում է հայկական ճարտարապետության եզակի նմուշներից:

Ուխտավորներին պատմեցին կաթողիկոս Ղազար Ա Ջահկեցու գրի առած մի ավանդություն, ըստ որի` 1381թ–ին` Լենկթեմուրի արշավանքի ժամանակ, Հայրավանքի վանահայր Հովհանը Քրիստոսի Խաչափայտի մասունքով` խաչի զորությամբ, բռնակալի գերեվարած հազարավոր հայերի փոխակերպել է աղավնու և ազատ արձակել:

This slideshow requires JavaScript.

Այնուհետև ուխտավորներն այցելեցին Սևանավանքի վանական համալիր: Այնտեղ նրանց դիմավորեց Վազգենյան հոգևոր ճեմարանի սան Էդմոն դպիր Հովսեփյանը, ով ներկայացրեց Ս. Առաքելոց և Ս. Աստվածածին եկեղեցիների  ստեղծման պատմությունը: Այնուհետև ուխտավորները, շարունակելով իրենց ճանապարհը, հասան Ախթալայի Ս. Աստվածածին եկեղեցի:

Ախթալայի վանական համալիրը Հայաստանի ուղղափառ վանքերից է: Այս համալիրը նաև աչքի է ընկնում իր ճարտարապետությամբ, գեղատեսիլ բնապատկերներով և առեղծվածային լեգենդներով: Համալիրում նրանց դիմավորեց տեր Վիգեն քահանա Ղազարյանը: Նա օրհնեց ուխտավորներին, այնուհետև բոլորը միասնաբար աղոթք հղեցին առ Աստված, և շարականի երգեցողության հնչյունները տարածվեցին եկեղեցում:

Այդ ուխտագնացությունը վառ ու անմոռանալի զգացումներ պարգևեց ուխտավորներին, որոնք դեռ երկար կմնան նրանց սրտերում:

Վայոց ձորի թեմի
Երիտասարդաց միություն