Զինվորական երդման հանդիսավոր արարողություն Ջերմուկի Սբ. Գայանե եկեղեցում


 

 

«Բավական չէ իր Ազգի զավակը լինել,

պետք է նաև նրա հրաշունչ զինվորը լինել»։

Գ. Նժդեհ

 

Օգոստոսի 8-ին  Ջերմուկ  քաղաքի պատմության մեջ առաջին անգամ տեղի ունեցավ զինվորական երդման հանդիսավոր արարողություն:

 Ջերմուկի արվեստի դպրոցի սաները, Սրբ. Գայանե եկեղեցու երգչախումբը և եկեղեցասեր երիտասարդների խորհրդի անդամները փոքրիկ միջոցառմամբ  իսկական տոնի վերածեցին այդ օրը:

Միջոցառման ընթացքում հնչած հայրենասիրական երգերն ու ոգեշնչող խոսքերն էլ ավելի ամրապնդեցին և հայրենիքի հանդեպ ջերմությամբ լցրին նորակոչիկների սրտերը: Իսկ Հայաստանի տարբեր շրջաններից եկած նրանց հարազատները, տեսնելով իրենց որդիներին զինվորի համազգեստով, ավելի լավ գիտակցեցին, որ այս օրվանից սկսած իրենց զավակները հայրենիքի <<հրաշունչ զինվորներն>> են, ովքեր պիտի պաշտպանեն մեր հայրենիքը:

Երդման արարողությունը զինվորի կյանքում ամենակարևոր պահն է: Զինվորական երդում տալուց հետո նորակոչիկները ավելի լավ են գիտակցում իրենց առաքելության ծանրությունը: Զինվորական ծառայությունը միայն ֆիզիկական պատրաստվածությունը չէ կամ զենք կիրառելու արվեստը, այլև հայրենիքը անձնվիրաբար պաշտպանելու գերագույն գաղափարին հասնելու իրական ուղին: Ինչպես Գարեգին Նժդեհն է ասել. <<Փոքր ազգերը պարտադրորեն ավելի հայրենասեր պիտ լինեն, քան մեծերը, մենք՝ ավելի, քան բոլորը>>:

Երդման արարողությունից հետո Ջերմուկի տարածաշրջանի հոգևոր հովիվ Տեր Գալուստ քահանա Սահակյանն իր օրհնությունը տվեց զինվորներին և իր խոսքում կարևորեց զինվորներից յուրաքանչյուրի հայոց բանակում լինելը`այն ուժեղացնելու համար:

Վերջում արժանապատիվ Տեր Հայրը մաղթեց նրանց խաղաղ ծառայություն և բարի վերադարձ իրենց ընտանիքներ:

Իրենց շնորհավորական խոսքով հանդես եկան նաև Ջերմուկի փոխքաղաքապետ Ս. Մարգարյանը, ինչպես նաև Զորամասի հրամկազմը`  վստահեցնելով  բոլոր մայրերին, որ իրենց որդիներն ուշադրության պակաս չեն զգա:

Վերջում ավելացրեց, որ դա միայն պաշտոնից բխող խոստում չէ, այլ բանակում ապահով լինելու պարտադիր պայման:

Սրբ. Գայանե եկեղեցու Երիտասարդաց միություն

Advertisements