Մեկնարկային հանդիպում «Տեղական մասնակցության և ոչ խտրականության» փորձի ու գիտելիքի փոխանակման ցանցի աշխատանքային խմբի հետ  


Օգոստոսի 17-ին Վայոց ձորի  մարզպետարանում տեղի ունեցավ ծրագրի իրականացման նպատակով ստեղծված «Տեղական մասնակցության և ոչ խտրականության» փորձի ու գիտելիքի փոխանակման ցանցում աշխատանքային խմբի մեկնարկային հանդիպումը:

Խմբում ընդգրկված էին ՀՀ Վայոց ձորի մարզպետարանի ներկայացուցիչներ, Հայ Առաքելական  Սուրբ  Եկեղեցու Վայոց ձորի թեմի հոգևորականներ, մարզպետարանի աշխատակազմի տեղեկատվության և հասարակայնության հետ կապերի բաժնի պետը, «Վարդաձոր» և «Ագրոկամուրջ» ամսաթերթերի խմբագիրները, թեմի լրատվության բաժնի պատասխանատուն, Քրիստոնեական դաստիարակության կենտրոնի (ՔԴԿ)-ի, տեղական ինքնակառավարման մարմինների, կրթական հաստատությունների, հասարակական կազմակերպությունների ներկայացուցիչներ:

 Հանդիպումն սկսվեց Վայոց ձորի թեմի Ջերմուկի տարածաշրջանի հոգևոր հովիվ Տեր Գալուստ  քահանա Սահակյանի աղոթքով: 

Ակնկալվում է  ծրագրի իրականացման արդյունքում փոփոխել երեխա ունենալը սեռով պայմանավորելու խնդրի վերաբերյալ մարդկանց վերաբերմունքը՝ երևույթի հանդեպ նոր  ընկալումների ու ձեռք բերած գիտելիքների հիման վրա: Եվ ձևավորված նոր վերաբերմունքի արդյունքում  պտղի սեռով պայմանավորված հղիության արհեստական ընդհատումները կրճատել առնվազն 10 տոկոսով:

Ծրագիրն իրականացվում է  Հայաստանի Հանրապետության մարզերում ու մայրաքաղաքում ՀՀ կառավարության աջակցությամբ և Եվրոպական միության ֆինանսավորմամբ՝ Մարդկային զարգացման միջազգային կենտրոնի, Արմավիրի զարգացման կենտրոնի, Մարտունու կանանց համայնքային խորհրդի և «Սեյվ դը չիլդրեն»  միջազգային կազմակերպության հայաստանյան ներկայացուցչության կողմից:

Հանդիպման ընթացքում Մարդկային զարգացման միջազգային կենտրոնի գործադիր տնօրեն Արմեն Գալստյանը ներկայացրեց «Պտղի սեռի խտրական ընտրության դեմ պայքարի» ծրագրի իրականացման գործողություններն ու նախատեսված միջոցառումները, իսկ հետազոտությունների և զարգացման բաժնի ղեկավար Վահան Ասատրյանը՝ փորձի և գիտելիքի փոխանակման ցանցի և դրա խմբերի գործունեության հիմնական սկզբունքները:

Ծրագրի հաջորդ փուլում նախատեսվում է  համապատասխան ուսուցում աշխատանքային խմբերի համար:

Սիրան Սարգսյան
Թեմի լրատվության բաժնի
պատասխանատու

 

Advertisements