Այսօր Վայոց ձորի թեմի Առաջնորդ  Գերաշնորհ Տեր Աբրահամ արքեպիսկոպոս Մկրտչյանը նոր օրհնված Սուրբ Մյուռոնով օծեց սահմանամերձ Խաչիկ և Արտաբույնք համայնքների Սբ. Աստվածածին եկեղեցիների գմբեթների խաչերը, որոնց բարերարն էր Համլետ Մարգարյանը:

Օրն այսօր կրկնակի տոնական էր սահմանամերձ Խաչիկ համայնքում, քանի որ նշվում էր նաև համայնքի տոնը և «Գաթայի փառատոն»-ը:

Նախ տեղի ունեցավ խաչերի օծման արարողությունը, որը նախաձեռնել էր Խաչիկ համայնքի հոգևոր պատասխանատու  և ՀՀ ԶՈՒ հոգևոր սպասավոր Արսեն սրկ. Մաթևոսյանը:

Առաջնորդ Սրբազան Հայրը  Մայր Աթոռից բերված նոր օրհնված Ս. Մյուռոնով օծեց Սբ. Խաչերը, որից հետո խանդավառ ծափերի ներքո այն զետեղվեց Սբ. Աստվածածնի գմբեթին, իսկ մյուս խաչը տարվեց Արտաբույնք` այն եկեղեցու գմբեթին զետեղելու համար:

Սրբազան Հայրը հանդես եկավ օրհնության խոսքով, որը եզրափակեց՝ ասելով.<< Թող հաղթության մյուռոնով օծված հաղթանակի նշան Սուրբ Խաչը միայն օրհնություն և հաղթանակ պարգևի Ձեզ և հովանի լինի մեր հայրենիքին ու եկեղեցուն>>:

Վայոց ձորի թեմի Առաջնորդ  Գերաշնորհ Տեր Աբրահամ արքեպիսկոպոս Մկրտչյանն օրհնեց  տոնը խորհրդանշող գաթան, որից հետո սկսվեց տոնախմբությունը: Ի դեպ, այս տարվա գաթան թխված էր 2,5 մ տրամագծով:

Այնուհետև ելույթ ունեցավ համայնքի ղեկավար Վարդան Ներսիսյանը:

Տոնի խորհուրդն ու համայնքի պատմությունը պարբերաբար ներկայացվում էր հյուրերին:

Հանդիսության ընթացքում ելույթ ունեցան Խաչիկի Սբ. Աստվածածին եկեղեցու երգչախումբը, Խաչիկի զորամասի զինվորական փողային նվագախումբը, համայնքի պարային համույթը և «Սայաթ–Նովա» մշակութային միության Երևանի Ջիվանու անվան աշուղական դպրոցի Վայոց ձորի մասնաճյուղի սաները` ղեկավարությամբ միջազգային մրցույթների դափնեկիր, մեդալակիր Սամվել Գրիգորյանի:

Դեպի հրապարակ տանող ճանապարհի տաղավարներում ներկայացվում էին գյուղը խորհրդանշող հուշանվերներ, նկարներ և ճաշատեսակների նմուշներ, որոնցով համայնքի բնակիչները հյուրասիրում էին ներկաներին:

Վայոց ձորի թեմի Երիտասարդաց միությունը ևս ներկայացրել էր «Դեկորատիվ արվեստի զարգացումը Եղեգնաձոր համայնքում» ծրագրի  շրջանակներում  իրականացված բատիկի և պոլիմերային կավի խմբակների մասնակիցների  պատրաստած աշխատանքերը:

Ուրախալի է, որ այս տարի ևս համայնքի տոնին մասնակցում էին ոչ միայն մարզի տարածքից եկած հայորդիներ, այլև՝ Հայստանի տարբեր մարզերից և Սփյուռքից ժամանած բազմաթիվ մասնակիցներ:

Ողջ այս հանդիսությունը կազմակերպվել էր համայնքապետարանի և համայնքի հոգևոր պատասխանատու և ՀՀ ԶՈՒ հոգևոր սպասավոր Արսեն սրկ. Մաթևոսյանի ջանքերով:

Թող Սուրբ Մյուռոնն օրհնաբեր լինի Խաչիկ համայնքի համար, և նորաօծ Սուրբ Խաչը թող պահպանի, զորացնի խաչիկցիներին ու մեզ բոլորիս:

Սիրան Սարգսյան
Թեմի լրատվության
բաժնի պատասխանատու