Հուշարձանների և տեսարժան վայրերի միջազգային օրվան նվիրված միջոցառում Զորաց տաճարում


Ապրիլի 18-ը աշխարհի բազմաթիվ երկրներում նշվում է որպես Հուշարձանների և տեսարժան վայրերի միջազգային օր:

Վայոց ձորի մարզի բոլոր դպրոցների, ուսումնական մյուս հաստատությունների և մարզում գտնվող զորամասերի զինվորների միջոցով սանիտարական-մաքրման աշխատանքներ կազմակերպվեց բոլոր պատմական հուշարձաններում:

Օրվա խորհրդին նվիրված աշխատանքներն ամփոփվեցին Եղեգիս համայնքում գտնվող Զորաց տաճարում, որի ճարտարապետական հորինվածքն անսովոր է. ունի արևելյան մաս՝ խորանով և  եզրային ավանդատներով, զուրկ է դահլիճային մասից. վերջինիս փոխարինում է եկեղեցու առջևի հրապարակը: Հուշարձանի հազվագյուտ ձևը որոշ ուսումնասիրողների ենթադրել է տվել, որ այն նախատեսված է եղել պատերազմ մեկնող զորքերի համարայստեղից էլ նրան տրված   «զորաց» անվանումը: Զորաց եկեղեցու մասին կարդալ այստեղ:

Զորաց Սբ. Աստվածածին եկեղեցում միջոցառում էր  կազմակերպվել ՊՄՊ  Վայոց Ձորի մարզային ծառայության պետ Մելանյա Դովլաթյանի նախաձեռնությամբ: Հրավիրված էին Վայոց ձորի աշխարհիկ, հոգևոր և զինվորական դասի ներկայացուցիչներ:

Ներկա էին շրջակա համայնքների համայնքապետեր, դպրոցների տնօրեններ, ուսուցիչներ և աշակերտներ:

Միջոցառումն սկսեց Եղեգնաձորի տարածաշրջանի հոգևոր հովիվ Տ. Վազգեն քահանա Հովհաննիսյանը՝ <<Հայր մեր>>-ով և <<Պահպանիչ>> աղոթքով:

Այնուհետև Արժանապատիվ Տեր Հայրն իր օրհնության խոսքն ուղղեց ներկաներին, ով իր խոսքում մասնավորապես ասաց. <<Այսօր, ինչպես աշխարհի շատ այլ ազգերի, այնպես էլ  մեզ համար, շատ կարևոր են մշակութային արժեքները, ինչպես նաև՝ դրանց պահպանման անհրաժեշտությունը: Մենք մեր հայրերից հսկայական ժառանգություն ենք ստացել տաճարների ու բերդերի, երգերի ու պարերի, կերակուրների և այլնի տեսքով: Մշակույթը յուրաքանչյուր ազգի դեմքն է, դիմագիծը, շարժուձևը, նիստուկացը, հետևաբար, ինչպես ամեն ազգ, մենք էլ աչքի լույսի պես պետք է դրանք պահենք ու պահպանենք >>:

Այնուհետև ելույթ ունեցան նաև ՀՀ Վայոց ձորի մարզպետի տեղակալ Մելս Հարությունյանը, «Գլաձորի համալսարան» պատմամշակութային արգելոց-թանգարանի վարիչ Բորիս Քոչարյանը և այլք:

Միջոցառման ընթացքում ներկայացվեցին ազգային խաղեր ու մրցույթներ, երգ ու պար:

 

Նման միջոցառումները նպաստում են, որ մենք մեր ազգային արժեքներն աչքի լույսի պես պահենք ու պահպանենք:

Սիրան Սարգսյան
Թեմի լրատվության բաժնի
պատասխանատու

Advertisements