Վայոց Ձորի թեմ

ՎԵՐԱԾՆՈՒՆԴ (ՄԵԾ ԵՂԵՌՆԸ ՎԵՐԱՊՐԱԾԻ ՀՈՒՇԵՐԸ)

Advertisements

 Նոր բնակրան, նոր ընկեր 

Հովհաննես Ալեքսանդրյան (1902-1988թթ.)

Վերև նշված դեպքերից մի քանի ամիս հետո մեր տան տերը պահանջեց, որ բնակարանը դատարկենք, որովհետև ինքն է ուզում զբաղեցնել: Սկսել էի նոր բնակարան ճարելու մասին մտածել և փնտրել, երբ  մի օր ինձ մոտ եկավ երզնկացի Երիցյան Վահրիճը: Իմ տարեկից, ինձ նման որբ ու անտուն, առաջարկեց մի սենյակ վարձել և միասին ապրել: Համաձայնեցի ու սկսեցինք քաղաքի հայերի տները գնալ, հարցնել՝ վարձու սենյակ ունեն: Երբ հայտնում էինք, որ առանց ընտանիքի՝ 2 որբ տղաներ ենք, հրաժարվում էին մեզ վարձակալ ընդունել:

Ոսկերիչ վարպետիս փեսան Քեպչելի կոչված թաղում 2 հարկանի տուն ուներ, որի առաջին հարկում ապրում էր 2 կին ունեցող կյուրինցի մի հայ, իսկ 2-րդ հարկը մեզ էր տալու: Այս անգամ էլ այդ մարդն արգելք հանդիսացավ: Երկար փնտրելուց  հետո այրի տարեց մի կնոջ մոտ սենյականման մի միջանցք ճարեցինք:

 

Հույների պարտությունը

 Մինչ այդ Քեմալը հույներին հաղթեց՝ շնորհիվ Իտալիայի, Սովետի և Ֆրանսիայի օգնությամբ, Անգլիայի դավադրությամբ կազմակերպեց Իզմիրի հայ, հույն բնակչության ահավոր կոտորածը՝ այդ պետությունների զրահանավերի մոտ: Այն դժբախտները, որոնք կարողացել են իրենց գցել ծովը և լողալով այդ նավերին հասնել՝ եռացրած ջրով խեղդել են: Միայն հունական և եգիպտական նավերն էին, որ վերցրել էին իրենց հասած աղետյալներին, իսկ <<քաղաքակիրթ>> մեծ պետությունների նավաստիները զբաղվել են այդ ահավոր եղեռնի տեսարանը նկարահանելով և իրենց նավերին հասած դժբախտներին՝ եռացրած ջուր սրսկելով:

 

Քեմալի նորամուծությունները 

Քեմալը Թուրքիաի իշխանությունն իր ձեռքը վերցնելուց և մեծ պետությունների աջակցությամբ իր դիրքերն ամրապնդելուց հետո մի շարք նորամուծություններ կատարեց, որոնց թվում արգելեց ոգելից խմիչքները: Այն է՝ օղին, կոնյակը, գինին և այլն, եթե որևէ մեկի մոտ հայտնաբերվեր մեկ լիտր օղի կամ նկատի, որ հարբած է, ապա՝ 6 ամիս բանտարկություն կամ 200 ոսկի, թուղթ դրամ տուգանք էին տալիս: Այդ օրենքի հետևանքով քաղաքի ազդեցիկ թուրքեր, որոնց վրա օրենքը չէր ազդում, սկսեցին օղի թորել տալ զանազան նյութերից և կրկնակի եռակի գներով վաճառել: Այդ գործում թուրքերին օգնում էին հայերը: Ընկերս՝ Վահրիճը, այդ գործով զբաղվող մի հայի հետ ծանոթացել և նրանից մի ոսկով օղի էր վերցել և երկուսով վաճառում էինք: Այն օրը, որ գործը հաջող էր լինում, կես օրվա ճաշին գալիս էինք ինձ մոտ և առաջարկում էր գնալ միասին խորոված ուտելու, չէր մոռանում նաև իր հետ բերել մի փոքր շիշ օղի:

 

Շարունակելի…

Ձեռագրի վերծանումը, համակարգչային
շարվածքն ու խմբագրումը` Սիրան Սարգսյանի

 

Advertisements