«Հրաժեշտ այբբենարանին» հանդեսն իսկական տոն էր Կեչուտի միջնակարգ դպրոցի առաջին դասարանցիների համար: Նրանք ներկայացրին Մեսրոպ Մաշտոցին ու նրա կենսագրությունը, ապա հնչեցրին այբուբենի տառերը` իմաստուն խոսքերով, երգ ու պարով համեմված:

 Շուտով կավարտվի ուսումնական տարին և փոքրիկներն արդեն տառաճանաչ են: Մանուկները երախտագիտությամբ հրաժեշտ են տալիս այբբենարանին, նրանց ոգևորությունը մեծ էր,  իսկ ուսուցիչներն ու ծնողները` հուզված:

Փոքրիների միջոցառմանը ներկա էին դպրոցի տնօրեն Ստեփան Ստեփանյանը, 4-րդ բանակային կորպուսի հոգևոր պատասխանատու, Ջերմուկի տարածաշրջանի հոգևոր հովիվ Տեր Գալուստ քահանա Սահակյանը, ուսուցիչներ, ծնողներ, աշակերտներ և այլք:

Տնօրեն Ստեփան Ստեփանյանը  հիացած էր միջոցառման մտահղացումներով և ոգևորված երեխաների ելույթներով: Վերջինս, շնորհավորելով առաջին դասարանցիներին տառաճանաչ դառնալու կապակցությամբ, շնորհակալություն հայտնեց դասվարին այս ամենը կազմակերպելու համար:

Այնուհետև ելույթ ունեցավ Արժանապատիվ Տեր Հայրը, ով իր խոսքում մասնավորապես ասաց.«Մարդու համար տառաճանաչությունը նույնքան կարևոր է, ինչքան երեխայի համար քայլելը: Այն պիտի օգնի երեխաներին, որպեսզի նրանք գիտության ասպարեզում մշտապես սնունդ ստանան»:

Վերջում Տեր Գալուստը, իր խոսքն ուղղելով ուսուցիչներին, ասաց, որ Դուք Մեսրոպ Մաշտոցի հետնորդներն ու գործի շարունակողներն եք հասարակության մեջ:

Վերջում աղոթք հնչեցվեց  մեր երկրի խաղաղության և բանակի զորության համար:

Սիրան Սարգսյան
Թեմի լրատվության
բաժնի պատասխանատու