Տոնակատարություն Մալիշկայի Սուրբ Աննա եկեղեցում


Տոնակատարություն Մալիշկայի Սուրբ Աննա եկեղեցում

Այսօր՝ օգոստոսի 23-ին, Հայ Առաքելական Սուրբ Եկեղեցին ոգեկոչեց Սբ. Աստվածածնի ծնողների՝ Սբ. Հովակիմի, Սբ. Աննայի  և յուղաբեր կանանց հիշատակը:

Այդ օրը Մալիշկա համայնքի Սբ. Աննա եկեղեցու անվանակոչության օրն է:

Սբ. Աննա եկեղեցում մատուցվեց Սբ. և Անմահ Պատարագ: Օրվա պատարագիչն ու քարոզիչն էր Վայոց ձորի թեմի փոխառաջնորդ Տ. Զարեհ վարդապետ Կաբաղյանը:

Հայր Սուրբը, վկայակոչելով հոգևոր–բարոյական բարձր արժանիքներով ապրող Սբ. Հովակիմի և Սբ. Աննայի կազմած սրբազան ընտանեկան հարկը, նրանց օրինակով՝ կարևորեց քրիստոնեական արժեքներով ապրող այսօրվա հայ ընտանիքի կարևորությունը պետության և եկեղեցու կայացման, ազգային ինքնության պահպանման սրբազան գործում:

Սբ. Պատարագի ավարտին կատարվեց Անդաստանի կարգ:

Արարողությանը ներկա էին Մալիշկա համայնքի ղեկավար Մհեր Մովսիսյանը, համայնքապետարանի աշխատակիցներ, ավագանու անդամներ, համայնքի բնակիչներ, աշակերտներ, ուսուցիչներ:

Տոնակատարություն Մալիշկայի Սուրբ Աննա եկեղեցում

Ուխտավորաբար Սբ. Աննա եկեղեցի էին եկել Վեդու Սբ. Աստվածածին եկեղեցու հոգևոր հովիվ Տ. Հովակիմ քահանա Հարությունյանը՝ երեցկնոջ՝ Աննայի և ուխտավորների հետ:

Արարողության ավարտին եկեղեցու բակում տեղի ունեցավ մշակութային հանդիսություն, որի ընթացքում գեղեցիկ պարային կատարումներով հանդես եկան Մալիշկա համայնքի ազգագրական «Հայք» պարի համույթը (պարուսույց, գեղարվեստական ղեկավար՝ Դադիկ Մարտիրոսյան):

Տոնակատարություն Մալիշկայի Սուրբ Աննա եկեղեցում

Թող Սուրբ Աստվածածնի սրբաբույր ծնողները՝ Սուրբ Հովակիմն ու Սբ. Աննան, Սուրբ յուղաբեր կանայք բարեխոս լինեն բոլորիս և թող Ամենակալ Աստված մեր ուխտն ի կատար ածի:

Սիրան Սարգսյան
Թեմի լրատվության
բաժնի պատասխանատու

 

Advertisements