Տյառնընդառաջի տոնը Մալիշկայի Սուրբ Աննա եկեղեցում


Փետրվարի 13-ին Տյառնընդառաջին նվիրված եկեղեցական արարողություն կատարվեց Մալիշկայի Սուրբ Աննա եկեղեցում, որին ներկա էին եկեղեցու այս տարվա խաչքավոր Նահապետ Խաչատուրի Հարությունյանը և համայնքի բազմաթիվ բնակիչներ և աշակերտներ:

Եղեգնաձորի տարածաշրջանի հոգևոր հովիվ Տեր Վազգեն քահանա Հովհաննիսյանը, շնորհավորելով ներկաներին ու բոլոր նորապսակներին տոնի կապակցությամբ,  հանդես եկավ տոնի խորհուրդը  քարոզող հայրական խոսքով:
Երեկոյան ժամերգության և Անդաստանի արարողության ավարտին Արժանապատիվ Տեր Հայրը, Ս. Խորանի վրայից վառելով մոմը, եկեղեցու բակում վառեց Տյառնընդառաջի  խորհրդանշական խարույկը:

Այնուհետև եկեղեցու բակում գեղեցիկ ելույթներով հանդես եկան Մալիշկայի թիվ 1 միջն. դպրոցի աշակերտները:

Իսկ երբ կրակի բոցը ցածրացավ, ներկաները շուրջպար բռնեցին խարույկի շուրջ՝ երգելով ժողովրդական «Տերնընդեզ» երգը, ինչպես նաև ցատկելով խարույկի վրայով:

Վերջում ներկաները հյուրասիրվեցին խաչքավորի ընտանիքի կողմից պատրաստված քաղցրավենիքներով և աղանդերներով:

Նյութը և լուսանկարները՝ Սիրան Սարգսյանի